Maliliit na negosyo, 'backbone' ng ekonomiya, dapat lang na mas patatagin

@Editorial | August 30, 2022

Sa nakalipas na dalawang taon, maraming negosyo ang pinadapa ng pandemya dulot ng COVID-19.

May mga tuluyan nang nagsara habang may ilan naman na patuloy na nakikipagsapalaran, umaasa na makakabawi pa rin.

At ngayon na unti-unti nang nagkakaroon ng pag-asa at lumalakas nang muli ang ekonomiya ng bansa, nabubuhayan na ng loob ang mga negosyante.

Nakakatuwa rin na kabilang din sila sa mga prayoridad ng gobyerno. Kung saan, sa launching ng Micro, Small, Medium Enterprises o MSME Summit 2022, binigyang halaga ang papel ng maliliit na negosyante sa bansa.

Ang MSMEs ay itinuturing na ‘backbone’ o pundasyon ng ekonomiya ng bansa lalo’t kalahati umano ng bilang ng mga manggagawa sa bansa ay galing sa kanilang hanay.

Kaya marapat lang na mabigyan ng proteksyon ang mga negosyante para mapaunlad pa ang kanilang negosyo na magsisilbing daan para sa pagbubukas ng mas maraming trabaho o oportunidad sa mga kababayang nangangailangan.

Sadyang hindi matatawaran ang sipag, dedikasyon, diskarte at pagsisikap ng mga Pinoy. Sa kabila ng mga pagsubok, nagagawa pa ring ngumiti, tanggapin ang sitwasyon at lumaban. Pero siyempre, kailangan pa rin ang pag-alalay ng gobyerno, kaagapay ang mga nasa pribadong sektor.

Umaasa tayo na makakaraos din tayo sa mga kinakaharap na krisis. 'Ika nga, kahit mabagal, ang mahalaga, tayo'y umuusad. Samahan lang ng tiyaga, katapatan at higit sa lahat, pananalig sa Diyos.