Makabagong teknolohiya para sa pagsasaka

@Editorial | July 22, 2022

Pinag-aaralan ng Department of Agriculture (DA) ang pagsasabuhay ng ‘Masagana 150’ program na unang ikinasa ng administrasyon ng yumaong ama ni Pangulong Ferdinand “Bongbong” Marcos, Jr.

Nakadisenyo ang programa para mapataas ang produksyon ng bigas sa pamamagitan ng pagpapautang sa mga magsasaka ng mga binhi na makapagbibigay ng mas masaganang ani.

Kaugnay nito, gagamit umano ng makabagong teknolohiya sa nabanggit na programa.

Sa pamamagitan ng programa ay inaasahang maibababa ang presyo ng bigas kasabay ng pagpapaunlad sa kabuhayan ng mga magsasaka.

Sa ngayon pinangangasiwaan ni Pangulong Marcos ang DA sa layong maresolba ang lahat ng isyu sa kagawaran.

Umaasa tayong sakaling buhayin ang ‘Masagana 150’, ito na ang muling magpapasigla sa pagsasaka na magiging malaking tulong sa ating pagbangon mula sa pandemya.

Kailangang magtulungan ang gobyerno, pribadong sektor at mamamayan sa lahat ng magagandang programa na layong mas mapaunlad ang bayan.