Magtulungan para sa mabilis na pagbangon ng turismo

@Editorial | September 29, 2022

Sa selebrasyon ng World Tourism Day 2022 na may temang “Rethinking Tourism”, tiwala ang ating gobyerno na muling babalik ang sigla ng turismo ng bansa matapos ang naranasang COVID-19 pandemic na sinabayan pa ng mga bagyo.

Positibo tayong makakabawi sa pamamagitan ng pagtutulungan ng bawat isa sa kabila ng pandemya at iba’t ibang kalamidad na tumama sa bansa.

At hindi lamang ang mga opisyal ng pamahalaan ang dapat na maging ambassador ng Philippine Tourism na magrerepresenta ng Pilipinas sa mundo kundi ang bawat Pinoy.

Batid naman natin na ang World Tourism Day ay pagdiriwang bilang pagkilala sa turismo na isang mahalagang haligi para sa pag-unlad.

Sa tema ngayong taon, layon nitong magbigay ng inspirasyon sa muling pag-iisip para sa pag-unlad ng turismo, kabilang ang sa pamamagitan ng edukasyon at mga trabaho, at ang epekto ng turismo sa planeta at mga pagkakataong magpapatuloy ang paglago nito.

Kung lahat ay magtutulungan, mabilis na makakabangon ang ating turismo. Mas uunlad ang pamayanan.