Magnet, babala ng malaking gulo at karibal sa labs at negosyo

ni Estrellia de Luna - @Panaginip gabay ng buhay | June 1, 2022

Analisahin natin ang panaginip na ipinadala ni George ng Zambales.

Dear Maestra,

Napanaginipan ko na pumunta ako sa isang museum, tapos nakakita ako ng magnet at sinubukan ko itong gamitin. Ayos naman at dumikit ito nang mabuti, tapos mayroon din akong nakitang mapa ng iba’t ibang bansa.

Ano ang ibig sabihin nito?

Naghihintay,

George

Sa iyo, George,

Ang magnet na nakita mo sa iyong panaginip ay nangangahulugan na masasangkot ka sa malaking gulo kung hindi ka mag-iingat. Ang sabi mo ay sinubukan mo itong gamitin, ito ay nagpapahiwatig na magkakaroon ka ng mahigpit na karibal sa puso ng iyong minamahal. At pati sa negosyo mo ay magkakaroon ka rin ng mahigpit na kakumpitensiya.

Samantala, ang mapa naman iba’t ibang bansa ay nangangahulugang maglalakbay ka sa iba’t ibang bansa at doon magtatrabaho sa loob ng maraming taon. Kung colored ‘yung mapa na nakita mo sa iyong panaginip, nagpapahiwatig ito na magbabalik ka sa sarili mong bansa nang mayamang-mayaman at tagumpay sa buhay.

Matapat na sumasaiyo,

Maestra Estrellia de Luna