ni Atty. Rodge Gutierrez @Mr. 1-Rider | Marso 26, 2024
Habang pinaplano ng pamunuan ng Land Transportation Office (LTO) ang pakikipag-usap nito sa mga stakeholder bago bumuo ng guidelines at regulations para sa mga may-ari ng e-bikes at mga ‘di rehistradong electric vehicles ay ipatutupad na simula April 15 ng Metropolitan Manila Development Authority (MMDA) ang pagbabawal sa mga e-trike at e-bike sa national roads.
Kung si LTO Chief Assistant Secretary Vigor Mendoza II ang tatanungin, kailangan muna umanong konsultahin ang nasabing sektor para malaman kung dapat ipatupad ang pagpaparehistro ng e-vehicles o kailangan bang obligahin ang mga gagamit nito na magkaroon ng driver’s license.
Kinumpirma mismo ni Mendoza na ang nasabing konsultasyon ay kaugnay ng utos ni Transportation Secretary Jaime Bautista na kausapin ang stakeholders bago i-finalize ang regulations para sa e-bikes.
Hindi pa natin alam kung ano na ang pinakahuling impormasyon hinggil sa planong dayalogo ngunit ipatutupad na simula Abril 15 ng MMDA ang pag-ban sa mga e-trike at e-bike sa national roads.
Dahil dito, maaaring ma-impound ang mga electric vehicle na mahuhuli kapag walang driver’s license ang nagmamaneho.
Iginiit naman ng MMDA na hindi bago ang patakaran dahil ipinag-utos na umano ng DILG noon pang 2020 na ipagbawal sa national road ang mga e-bike at e-trike.
Parehong may magandang plano ang dalawang ahensyang ito ngunit, posible itong magdulot ng kalituhan sa panig ng mga nagmamaneho ng e-bike at e-trike.
Dahil ang mga nagmamaneho ng e-bike at e-trike na inabot ng abiso na magkakaroon ng dayalogo sa LTO at umaasa na magsasagawa pa lamang ng panuntunan ay hindi matatakot na dumaan ng EDSA kasi wala pang napagkakasunduan.
Dapat maunawaan ng mga may-ari ng e-bike at e-trike na hindi puwedeng ikatuwiran sa MMDA na magkakaroon pa lamang ng dayalogo para makagawa ng bagong guidelines dahil ang hakbanging ito ng LTO ay konsiderasyon lamang sa mga may-ari ng e-bike at e-trike.
Samantalang kasado na ang MMDA, na ipatupad ang kautusan ng DILG kaya dapat na mag-ingat ang mga may-ari ng e-bike at e-trike na dati-rating dumaraan sa kahabaan ng EDSA dahil baka ma-impound ang kanilang sasakyan.
Hindi pa natin alam kung magkakaroon ng pagbabago ang dating kautusan ng DILG sakaling maisagawa na ang dayalogo at makabuo na ng mga bagong panuntunan ang LTO at ang mga may-ari ng e-vehicles.
Pero sa ngayon ay maaari itong magdulot ng kalituhan na humantong sa argumento sa pagitan ng enforcer at ng driver ng e-bike at e-trike.
Dapat sa mas maagang panahon ay maliwanagan ang mga nagmamaneho ng e-vehicle na hindi porke may nakaplanong dayalogo ang LTO sa kanilang hanay ay hindi na iiral ang mga naunang kautusan.
Hangad lang natin dito ang maliwanag na sitwasyon upang walang sisihang maganap.
Kaya malinaw na simula Abril 15 ay huhulihin na ang e-bike at e-trike sa EDSA ng MMDA dahil matagal na itong ipinag-utos ng DILG.
Asahang trak-trak sa rami ng e-bike at e-trike ang masasamsam ng MMDA dahil tiyak na meron at meron na walang lisensya dahil ito ang nakasanayang sistema ng mga driver ng e-bike at e-trike sa bansa.
Sana lang ay maging maunawain ang mga may-ari ng e-bike at e-trike sa mga pagbabago at paghihigpit dahil para sa kapakanan naman ito ng nakararami.
Ito rin ang sinasabi ko sa patuloy na pagdami ng de-gasolinang trike na gawa sa India na kalat na kalat na, hindi lang sa Metro Manila kundi maging sa mga lalawigan.
Nasasanay na ang mga kababayan natin sa paggamit nito, dapat sa umpisa pa lamang ay nagsagawa ng panuntunan hinggil dito upang hindi sila nakikipagsabayan sa mga highway.
At kapag dumami na nang lubusan ang mga de-gasolinang trike na ito at magkaroon ng mga asosasyon ay tiyak na ang pamahalaan na naman ang magmamakaawa para sila ay sumunod sa panuntunan.
Ang mga de-gasolinang trike ay halos kasing laki lang ng tricycle, kung saan ang mga tricycle ay hindi pinapayagang dumaan sa main road, pero ang mga de-gasolinang trike ay nakikipagpatintero pa sa mga sasakyan sa main road.
Delikado ang de-gasolinang trike dahil napakagaan lang nito pero umaabot sa anim hanggang walong pasahero ang pinagkakasya kaya kapag ito ay nabangga marami ang posibleng masawi.
Sana ay pagtuunan ng pansin ng kinauukulang ahensya kung sino ang puwedeng sumakop sa mga de-gasolinang trike na ito para magkaroon din sila ng sinusunod.
SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.