LGUs na eepal sa pamamahagi ng SAP, kakasuhan ng DILG

@Editorial | April 08, 2021

Nagsimula na ang pamimigay ng ayuda sa mga residente mula sa iba’t ibang lugar na sakop ng NCR Plus na kasalukuyang nasa ilalim ng enhance community quarantine (ECQ).

Kaugnay nito ay agad nagbabala na sasampahan ng kaukulang kaso ng Department of Interior and Local Government ang mga barangay officials na eepal at mananamantala sa pamimigay ng social amelioration program (SAP).

Ipinagbabawal ng DILG ang paglalagay ng pangalan o kahit pa initials lamang ng sinumang pulitiko sa ipamimigay na ayuda, in cash man ito o in kind.

Bawal din ang paglalagay ng picture o logo ng pulitiko sa envelope na paglalagyan ng ayuda o sa plastic na gagamitin kung groceries items ang ipamamahagi at maging ang pamumudmod ng mga polyetos.

Sa gitna ng kalamidad o sakuna, inaasahan ng ordinaryong mamamayan ang malasakit ng mga namumuno o lider ng bansa. ‘Wag sanang samantalahin ang kasalukuyang sitwasyon para makapagpalapad ng papel sa masa lalo pa’t malapit na rin ang susunod na eleksiyon.

Tandaan, ang tunay lingkod bayan ay marunong tumulong sa sariling sikap, malaman man ‘yan ng publiko o hindi.