Kaya nagpunta sa Spain… BEA AT VINCENT, NAGHAHANDA NA RAW SA KASAL

ni Ador V. Saluta @Adore Me! | May 17, 2025

Bea Alonzo at VIncent Co - IG, FB

Nauna nang natsismis na pinaghahandaan na ni Bea Alonzo at ng kanyang rumored BF at Puregold owner na si Vincent Co ang pagpapakasal nila sa Spain.

Dahil dito, pumalag ang kampo ni Bea tungkol sa nasagap na balita ng PEP na naghahanda na raw sila ni Vincent para sa kanilang kasal sa Spain.

Lalong umugong ang balita nang kumalat na may pictorial umano si Bea kasama si Vincent sa Spain.

Present din daw ang buong team ng isang kilalang photo studio na gagawa ng pictorial, subali’t hindi malinaw kung para saan ang pictorial, kung ito ba’y prenuptial engagement o iba pang binabalak ng couple at kung magkasama ba ang dalawa sa Spain.

Pero ayon daw sa mapagkakatiwalaang source, hindi sabay bumiyahe ang dalawa sa Spain. Sumunod na lang daw si Vincent.

Related daw sa kanyang trabaho ang ipinunta ni Bea sa Spain, maging ang naunang biyahe nito sa Thailand, kung saan namataang magkasama ang couple. 

Nag-shoot daw si Bea ng isang endorsement sa Thailand, at nag-pictorial din siya para sa isa ring produkto sa Andalucia, Spain.

Itong sa Spain daw ay para sa isang brand ng luggage na ine-endorse ng Kapuso actress. Kapareha raw ito ng isang kuha ni Bea sa Andalucia, Spain kung saa’y may dala-dala siyang luggage.

May isa pang litrato si Bea na kuha sa Andalucia, Spain, kung saan may kasama siyang lalaki habang naglalakad sila sa beach nang naka-holding hands. Hula ng mga netizens, si Vincent ito.

Dito rin nagsimula ang tsismis na nagde-date ang dalawa.

Ibig kayang sabihin nito ay bahagi lamang ng endorsement shoot ang larawan ni Bea kasama ang lalaking sinasabing si Vincent?

Hindi tiyak ng pangalawang source ng PEP kung saan unang namataan sina Bea at Vincent — sa Thailand ba o sa Spain.

Pero ang pagkakaalam ng nabanggit na source, nang nalaman daw ni Vincent na may shoot si Bea sa Spain, nagpadala ito ng pagkain sa set.

Pero noon pa man daw ay pursigido na si Vincent sa panliligaw sa aktres. Matagal na raw nanunuyo si Vincent kay Bea pero noong una, hindi raw ito pinapansin ng Kapuso actress dahil mag-on pa sila ni Dominic Roque.

Nang mag-break sina Bea at Dominic, doon na raw nagpursige si Vincent sa panliligaw sa aktres.

---

MARAMING netizens ang nasorpresa sa pagpasok ng bagong karakter sa Batang Quiapo (BQ), ang sexy star at Vivamax talent na si Angeli Khang. 

Kasabay ding winelcome ang beteranong aktor na si Leo Martinez na gumaganap na ama ni Angeli sa hit primetime series na BQ.

Dahil mag-amang magkasabwat sa milyong droga, isa na namang maaksiyong linggo ang dapat abangan ng mga manonood ng BQ sa muling pagsabak ni Coco Martin sa bakbakan.

Sabi nga ng isang suki ng BQ na si Jomy Capareda ng San Mateo, Rizal, “Hindi kaya dyoyowain lang ni Coco si Angeli kaya isinama sa serye?”

Diumano, marami raw kasing Kapamilya actress ang nasa line-up para sa serye and yet, ang sexy star ang inuna ni Coco.

Dahil sa pagpasok ng dalawa, mauuwi sa isang mabagsik na harapan ang mag-amang Tanggol (Coco Martin) at Ramon (Christopher de Leon), laban kina Miguelito (Jake Cuenca) at Roberto (Albert Martinez) matapos magkaaberya ang isang malaking transaksiyon nila sa droga gawa ng mag-amang Angeli at Leo.

Pero mukhang mas may matinding bakbakan pa ang naghihintay kay Tanggol dahil hindi na ito nagdadalawang-isip pa na muling kalabanin ang sariling amang si Ramon.

Gusto na kasing kumalas ni Tanggol sa mga ilegal na transaksiyon ni Ramon at handa na siyang magbagong-buhay para maging mabuting tao.

Huwag palampasin ang maaaksiyong kaganapan sa BQ, na hango sa orihinal na kuwento ng Regal Films, gabi-gabi ng 8 PM sa Kapamilya Channel, A2Z, TV5, iWantTFC, at Kapamilya Online Live.