ni Atty. Rodge Gutierrez @Mr. 1-Rider | Marso 28, 2024
Hindi pa halos natatapos ang problema ng ilang transport group hinggil sa Public Utility Vehicle Modernization Program ay nahaharap na naman sila sa hindi maawat na pagtaas ng presyo ng produktong petrolyo.
Ang patuloy na pagsirit ng presyo nito ay nagdudulot ng mga hamon sa iba’t ibang sektor ng lipunan, lalo na sa transportasyon. Isa sa mga sektor na apektado ng patuloy na pagtaas ng presyo ng krudo ay ang mga namamasada sa kalye.
Sa muling oil price hike, walang plano ang transport group na Pagkakaisa ng mga Samahan ng Tsuper at Opereytor Nationwide (PISTON) na hilingin sa Land Transportation Franchising and Regulatory Board (LTFRB) ang dagdag-pasahe sa mga jeepney.
Ayon kay PISTON president Mody Floranda, hindi pa nila iniisip na maghain ng petisyon para sa dagdag-pasahe sa kasalukuyang kalagayan ng mga mamamayan na karamihan ay kulang ang kinikita.
Hindi pa umano nila planong gawin ito lalo na’t alam din naman natin talagang kapos ang kinikita ng mga mamamayan, bagama’t karapatan ng mga driver at operator ang maghain ng petisyon para sa dagdag-pasahe, kaya lamang ay ayaw umano nilang sa mga pasahero maipasa ang bigat ng sitwasyon na maaaring magdulot ng dagdag na pasanin.
Gayunpaman, nanawagan ang PISTON sa pamahalaan na pag-aralan ang posibilidad ng pagtanggal ng buwis sa produktong petrolyo.
Dapat umanong pag-aralan ng gobyerno kung paano aalisin ‘yung masyadong mataas na buwis, ayon sa transport group.
Sa kanilang pananaw, ang pagtanggal ng buwis sa petrolyo ay magiging tulong sa pagpapagaan ng pasanin sa mga tsuper at operator ng mga pampasaherong jeepney.
Dahil sa patuloy na pagtaas sa presyo ng produktong petrolyo, mas lalong lumiliit ang kita ng mga tsuper at operator ng mga jeepney.
Ayon sa mga eksperto, inaasahang tataas ng P1.45 hanggang P1.75 per litro ang presyo ng diesel bago matapos ang Holy Week, habang tataas naman ng P2.20 hanggang P2.40 per litro ang presyo ng gasolina.
Ang mga pagtaas na ito sa presyo ng krudo ay direktang nakakaapekto sa operasyon ng mga pampasaherong jeepney dahil sa pagsirit ng presyo ng mga pangunahing materyales na kailangan sa kanilang mga sasakyan.
Sa ganitong sitwasyon, patuloy ang paghahanap ng mga transport group ng mga solusyon upang maibsan ang epekto ng sunud-sunod na oil price hike sa kanilang sektor. Kabilang dito ang pakikipag-ugnayan sa pamahalaan para sa posibleng tulong at suporta, gayundin ang pagtutulak ng mga polisiya na naglalayong mapagaan ang pasanin ng mga tsuper at operator ng mga pampasaherong jeepney.
Sa huli, mahalaga ang pagtutulungan at kooperasyon ng lahat ng sektor upang maresolbahan ang mga hamon na dala ng patuloy na pagtaas ng presyo ng krudo. Sa pamamagitan ng tamang koordinasyon at pag-uunawaan, maaaring makamit ang mga repormang magbibigay ng ginhawa at pag-asa sa mga manggagawa sa transportasyon at sa buong komunidad.
Sa pagkakataong ito ay bigyan naman natin ng pagsaludo ang transport group na sa kabila ng pagdurusang kanilang kinakaharap ay mas naisip pa nila ang kalagayan ng mga pasahero na unang-unang tatamaan.
Kung magkakaisa nga naman ang lahat ng sektor hinggil sa pagtugon sa mga problema ay malaking tulong ito sa pag-unlad ng bansa sa halip na nagsisisihan o nag-aaway-away. Magandang ehemplo ang naging hakbanging ito ng transport group na dapat pamarisan na tumutulong mag-isip ng solusyon para sa ikabubuti ng lahat.
Sa ngayon ay hindi kontrabida ang transport group dahil sa kitang-kita ng taumbayan ang kanilang pagmamalasakit — sila naman ang bida ngayon!
SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.