Kahulugan ng natanggap sa factory at may ibang kausap ang nililigawan

ni Estrellia de Luna - @Panaginip gabay ng buhay | August 21, 2022

Analisahin natin ang panaginip na ipinadala ni James ng Imus, Cavite.

Dear Maestra,

Napanaginipan ko na natanggap akong magtrabaho sa isang factory. Nakita ko ru’n ang nililigawan ko na may kausap na iba, ang sweet-sweet nila kaya nagselos ako nang todo.

Ano ang ibig sabihin ng panaginip ko?

Naghihintay,

James

Sa iyo, James,

Ang panaginip mo na natanggap kang magtrabaho sa factory ay nagpapahiwatig na matatapos na ang pag-aalala mo tungkol sa pera dahil mababayaran mo na ang mga utang mo. Gayundin, hindi ka na kakapusin sa pang-araw-araw mong pangangailangan.

Samantala, ang sabi mo ay nakita mo ang nililigawan mo sa naturang factory na may kausap na iba at sweet na sweet sila, kaya nagselos ka. Kabaligtaran ang ipinahihiwatig nito dahil ibig sabihin, magtatagumpay ka sa karibal mo. Ikaw ang magwawagi sa puso ng minamahal mo.

Matapat na sumasaiyo,

Maestra Estrellia de Luna