Kahulugan ng naiwanan ng bus papuntang Maynila

ni Seigusmundo Del Mundo - @Panaginip, salamin ng inyong buhay | September 23, 2020

Salaminin natin ang panaginip ni Lorena na ipinadala sa Facebook Messenger.

Dear Professor,

Napanaginipan ko na may mga bus sa probinsiya papunta sa Manila. Bumili ako ng ticket papuntang Manila, pero naiwanan ako ng bus, tapos sabi sa terminal, maghintay ako ng susunod na bus, pero kaunti lang daw ang mga bus at gabi na ako makakaalis. Ano ang ibig sabihin nito?

Naghihintay,

Lorena

Sa iyo, Lorena,

Alam mo, marami sa mga umuwi sa probinsiya ang ayaw nang bumalik sa Manila dahil doon ang sentro ng COVID-19. Ang ganitong sitwasyon ay nagbababala na liliit ang working force sa Metro Manila dahil ayaw nang magbalikan ng mga nasa probinsiya.

Base sa huling datos, ang mga nagsiuwi sa probinsiya ay nakahanap ng kita sa pagtitinda ng kung anu-ano at parang nakaraos din sila sa araw-araw kahit hindi sila empleyado.

Bilang pagtatapat, ang iyong panaginip ay nagbibigay ng mensahe na huwag ka munang lumuwas sa Manila.

Marami nang panaginip na tulad ng iyo kung saan pagkatapos ng ilang araw o panahon ay nasabi nila “Buti na lang ay nabigyan ako ng babala ng aking panaginip.” Kaya manatili ka sa probinsiya, ayon sa iyong panaginip.

Hanggang sa muli,

Professor Seigusmundo del Mundo