@Buti na lang may SSS | August 14, 2022
Dear SSS,
Magandang araw! Mahalaga bang i-update ang record ko sa SSS? Bagong kasal ako at nais kong ilagay na beneficiary ang aking asawa. - Abegail
Sagot
Mabuting araw sa iyo, Abegail!
Sadyang napakahalaga na updated at tama ang impormasyon ng iyong pangalan, petsa ng kapanganakan at iba pang detalye na nakatala sa iyong record sa SSS. Ang pagkakaroon ng hindi tugmang impormasyon sa iyong personal record ay maaaring magdulot ng problema sa miyembro, tulad mo Abegail, lalo na kung mag-a-apply ng loan at benefit claim sa SSS. Maaari kasing maantala ang pagpoproseso ng iyong mga transaksyon kung mayroong hindi tugma o discrepancies sa record mo. Kaya patuloy ang aming paghikayat na i-update ng mga miyembro ang kanilang record sa SSS, lalo na sa pagpapalit ng pangalan, petsa ng kapanganakan, higit lalo ang pagdagdag ng mga bagong benepisaryo. Katulad sa iyong kaso, dapat mong i-update ang iyong kasalukuyang civil status sa kadahilanang ikaw ay nag-asawa na at may legal na benepisaryo.
Simple lamang naman ang pag-update ng rekord sa SSS. Maaari mo itong gawin gamit ang iyong My.SSS account at hindi na kailangan pang magsadya sa pinakamalapit na sangay ng SSS. Kinakailangan lamang na ikaw ay nakarehistro na at may sariling My.SSS account.
Upang makapagrehistro rito, magtungo sa SSS website at i-click mo ang “MEMBER.” Dadalhin ka nito sa member login portal at i-click mo ang “Not yet registered in My.SSS?” upang masimulan ang iyong registration. Punan ang lahat ng kinakailangang impormasyon. Tandaan, ang gagamitin mong e-mail address ay dapat aktibo at palaging binubuksan dahil dito ipadadala ng SSS ang link para i-activate at magamit ang iyong account.
Kung ikaw ay mayroon ng My.SSS account, i-click mo ang “Member.” Mag-login ka gamit ang iyong user ID at password. Sunod, i-click ang “I’m not a robot” at i-click ang “Submit.” I-click mo ang “E-SERVICES” tab at hanapin mo ang “Request for Member Data Change (Simple Correction).” Piliin ang “CIVIL STATUS” upang maiupdate ang iyong civil status mula Single ito ay magiging Married.
Gamit ito ay maaaring i-update ang iyong apelyido, Abegail, mula sa apelyido mo sa iyong pagkadalaga na maaaring palitan sa apelyido ng iyong napangasawa. Sunod, dapat i-upload ang supporting document tulad ng Marriage Certificate bilang patunay ng pagbabago ng iyong civil status.
Pagkatapos nito, i-click mo ang “This is to certify that all information and documents are true” at isumite ito sa pamamagitan ng pag-click sa “SUBMIT.” Kapag successful ang iyong transaction, lilitaw ang transaction number. Mahalaga na tandaan mo ito. I-check mo ang iyong email na nakarehistro sa SSS sapagkat dito ipapadala ang Notice of Approval o Rejection sa iyong request.
***
Nais naming ipaalam sa aming mga pensyunado na maaari silang mag-comply sa Annual Confirmation of Pensioners (ACOP) Program o ang taunang pagrereport ng mga pensyonado sa SSS hanggang Oktubre 31, 2022. Ang mga pensyonado na dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death), at dependent (minor/incapacitated) pensioner sa ilalim ng guardianship.
Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”
Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.