Init ng ulo, huwag dalhin sa kalsada

by Info @Editorial | May 11, 2026

Habang tumitindi ang init ng panahon, dumarami rin ang mga nagiging mainitin ang ulo sa daan. 

Kaunting aberya sa trapiko, maling singit, o simpleng busina ay agad nauuwi sa sigawan at away. Ito ang dahilan kung bakit tumataas ang kaso ng road rage.

Pero walang magandang naidudulot ang galit sa kalsada. Isang iglap ng init ng ulo ay maaaring humantong sa aksidente, pananakit, o mas malalang trahedya. Tandaan na lahat ng motorista ay gusto lamang makauwi nang ligtas.

Oo, nakakadagdag ng iritasyon ang matinding init at mabigat na trapiko. Pero hindi ito dahilan para mawalan ng disiplina at respeto sa kapwa. 

Mas mahalaga pa rin ang mahabang pasensya at kontrol sa sarili.

Sa panahon ng matinding init, mas kailangan ang malamig na pag-iisip.