Huwag magpaloko sa mga ibinebenta online

by Info @Editorial | Feb. 4, 2025

Nagbabala ang Department of Health (DOH) laban sa isang pekeng Facebook page na maling nag-eendorso ng isang “nutritional milk” na umano’y lunas sa insomnia.

Ayon sa DOH, walang katotohanan ang nasabing pahayag, at hindi ito inaprubahan o kinikilala ng ahensya. 

Kasabay ang pagpapaalala na ang insomnia ay may iba’t ibang sanhi at walang instant na lunas. Bagama’t nakakatulong ang malusog na pamumuhay, mas epektibo umano ang tamang paggamot gaya ng sleep hygiene, therapy, at medikal na gabay.

Binalaan din ng DOH ang publiko laban sa mapanlinlang na marketing na gumagamit

ng pekeng testimonial, huwad na pahayag ng umano’y eksperto at exaggerated na health claims.

Inireklamo na ng ahensya ang naturang page sa Department of Information and Communications Technology (DICT) para sa agarang pagtanggal ng nasabing page.

Kaya sa mga netizens, maging maingat sa mga nababasa o napapanood online. Huwag magpabiktima. Sundan lamang ang mga legit o opisyal na social media accounts para sa tamang impormasyong pangkalusugan.

Hamon naman sa mga otoridad, mas palakasin ang kampanya laban sa mga manloloko at abusado na nagkalat online.