Huwag hintaying mabulaga ng mas mataas pang kaso ng COVID-19

@Editorial | June 14, 2022

Biglang tumaas ang bilang ng kaso ng COVID-19 sa bansa.

Ayon sa Department of Health (DOH), naitala kamakalawa, Hunyo 12, ang 308 na bagong nahawahan ng COVID. Ito umano ang pinakamataas na kaso ng sakit sa loob ng dalawang buwan.

Nasa 2,918 naman ang panibagong aktibong kaso ng sakit sa bansa. Ayon sa DOH, 153 sa 308 ay naitala sa Metro Manila.

Kaugnay nito, umabot na sa 3,693,222 ang kabuuang kaso ng COVID-19 sa Pilipinas. Nakapagtala naman ng 60,461 na nasawi sa sakit habang nasa 3,629,843 ang kabuuang gumaling.

Samantala, sinabi naman ng DOH na ang pagtaas ng COVID cases ay hindi maikokonsiderang “significant” sa ngayon. Nilinaw na hindi naman tumaas ang severe at critical cases.

Dagdag ng DOH, isa sa mga factors na naka-contribute sa pagtaas ng infections ay ang presensiya ng mas nakahahawang Omicron subvariant at ang bumababang immunity, dahil marami pang hindi naturukan ng booster shots.

Gayunman, huwag nating hintaying mabulaga ng mas mataas pang bagong kaso ng COVID-19. Dapat kabisado na natin ang mga dapat at hindi dapat gawin para makaiwas sa sakit. Hinay-hinay sa paggala at pagpunta sa matataong lugar. Batid natin na talagang malaya na tayo, maluwag na ang mga protocols pero huwag magpabaya.

Hindi pa tapos ang laban sa pandemic, halos nag-uumpisa pa lang tayong makabawi, huwag nating sayangin ang pagkakataon.