House-to-house testing, malaking tulong kontra-COVID-19

@Editorial | April 25, 2021

Sa kabila ng patuloy na panawagan na ‘mass testing’ kontra-COVID-19, ang inihirit naman ng Department of Health (DOH) ay ‘expanded testing’.

Ayon kay Health Undersecretary Maria Rosario Vergeire, dapat ding gawin ang house-to-house testing. Kung saan, tanging ang may mga sintomas o mga nalantad sa COVID-19 positive ang dapat na unahin.

Sa pamamagitan nito, mabilis na masusuri at maihihiwalay ang mga posibleng carrier ng virus.

Bagama’t nababawasan ang mga nagpopositibo sa COVID-19, masasabing mataas pa rin ang bilang at talagang kumakalat pa rin ang nakamamatay na sakit.

Kaya itong house-to-house testing ay malaki ang maitutulong para mapigilan ang hawaan.

Karamihan sa ating mga kababayan ang nagkakaroon ng sintomas subalit, hindi na nakakapagpa-test. Ilan sa kanilang dahilan ay nangangamba sa bayarin, natatakot na baka ‘pag nagpositibo ay maospital pa o madala sa hindi maayos na quarantine facility. At dahil dito, malaki ang posibilidad na kung positibo nga sa COVID-19 ay mahahawa ang ibang kasama sa bahay. Mas delikado pa kung may kaanak na senior, beybi o maysakit.

Bukod sa mapipigilan ang hawaan, sa pamamagitan ng testing na makakarating sa kinauukulan ang resulta, ay mabibigyan ng wastong medikasyon ang pasyente. Sakaling pahintulutang sa bahay na lamang mag-quarantine, mas mainam na may doktor o nurse na naka-monitor sa pamamagitan ng telepono o online.

Sana maging maayos ang pagpapatupad nitong house-to-house testing. Kumbaga, bago pa lumala o kumalat ang virus, agapan na.