Health insurance sa mga drayber

@Editorial | December 12, 2021

Nakapanlulumo ang nakaraang insidente na ikinasawi ng isang tricycle driver at kanyang pasahero matapos salpukin ng SUV.

Sa tala ng Metropolitan Manila Development Authority (MMDA), limang tricycle driver ang nagiging biktima ng aksidente sa loob ng isang araw.

Kaugnay nito, isinusulong ang pagbibigay ng malawakang proteksiyon sa hanay ng mga trike driver at operator.

Inihihirit na matugunan ang usapin sa health insurance. Napag-alamang may mga drayber na wala nito kaya walang mahugutan ng tulong sa oras ng pangangailangan.

Kasabay nito ang pagkakaroon ng kanilang kinatawan sa Kongreso na magtataguyod at mangangalaga sa kanilang mga karapatan tulad nang sa health at accident insurance at pagpapalawig sa iba’t ibang programa at proyekto para sa kanilang hanapbuhay at pamilya.

Batid natin ang kanilang hirap sa araw-araw na pamamasada sa kabila ng patuloy na pagtaas ng presyo ng petrolyo at mga bilihin, todo-kayod pa rin sila para lang may pantustos sa pamilya.

Kabilang din sila sa mga matatawag na frontliners sa gitna ng pandemya. Noong mga panahon na bawal lumabas, marami sa kanila ang nagsilbing volunteer sa pamimili hanggang sa paghahatid sa mga health workers at pasyente.

Hinaharap nila ang banta o panganib na malantad sa sakit.

Kaya marapat lang na mabigyan sila ng pansin at boses para mailahad ang kanilang mga saloobin at pangangailangan.