Gobyerno, galaw-galaw naman sa taas-presyo

by Info @Editorial | Nov. 14, 2024

May inaasahang taas-singil sa kuryente ngayong Nobyembre.

Para sa mga kukonsumo ng 200kwh, madadagdagan ang bayarin ng P85; dagdag-P128 naman sa makaka-300kwh; P171 sa 400kwh at P214 dagdag sa 500 kwh.

Isa sa mga pinakamalaking epekto ng taas-singil sa kuryente ang pagtaas ng gastusin sa mga pamilihan.

Ang mga pabrika at maliliit na negosyo, na madalas na umaasa sa kuryente para sa kanilang operasyon ay nakararanas ng pagtaas ng produksyon na siyang nagiging sanhi ng pagtaas din ng presyo ng mga produkto at serbisyo. Sa ganitong kalagayan, ang simpleng gastusin ng isang pamilya ay dumadami, nagiging dahilan ng mas malaking kakulangan sa budget.

Dito makikita ang agwat sa pagitan ng may kaya at walang kaya — isang agwat na mas lalala kung hindi agad maaaksyunan ng gobyerno at mga kumpanya ng kuryente.

Kailangan ng mas malalim na pagsusuri at konkretong hakbang upang mapigilan ang patuloy na pagtaas ng singil sa kuryente.

Maraming paraan upang matugunan ito, mula sa pagpapalawak ng mga renewable energy projects, pagpapaigting ng mga regulasyon sa mga pribadong kumpanya ng kuryente, hanggang sa pag-aalok ng mga subsidies o financial assistance sa mga pinakamahihirap na sektor ng lipunan.

Sa ngayon, ang pagtutok ng mga mambabatas sa isyung ito ay mahalaga upang matiyak na ang mamamayan ay hindi tuluyang malugmok sa matinding kahirapan dulot ng taas-singil hindi lang sa kuryente kundi maging sa iba pang serbisyo.