Gesta, nakansela ang laban dahil sa food poisoning

ni Gerard Arce - @Sports | July 26, 2020

Isang panibagong laban na naman ng Filipinong boksingero ang muling nakansela dahil sa hindi inaasahang pangyayari.

Hindi natuloy ang nakatakdang laban ni Mercito “No Mercy” Gesta kay undefeated Mexican American Hector Tanajara Jr. matapos tamaan ng food poisoning ang Cebuano-native.

Sasalang dapat ang 32-anyos na Labogon, Mandaue City-native sa isang regional lightweight title showdown para sa World Boxing Council-United States National Boxing Council (WBC-USNBC) na hawak ni Tanajara; ngunit napuwersang tanggalin na lang ito sa Golden Boy Promotions event nitong Huwebes ng gabi (Biyernes sa Pilipinas) sa Fantasy Springs Resort and Casino Events Center sa Indio, California.

Inihayag ni Gesta ang kanyang saloobin sa kanyang social media account hinggil sa masamang pangyayari na tumama sa kanilang mag-asawa nitong araw ng Miyerkules sa San Diego, California.

“Good morning to all my fans. Unfortunately, I’m truly sorry that I won’t be fighting tonight. My wife and I are still recovering from food poisoning on Wednesday night. I did my best, but the pain was real bad,” wika ng dating WBO-NABO Youth at WBO-NABO lightweight champion. “I had a great camp and feeling great during fight week and was on target for weigh-ins. Thank you so much to my Golden Boy Boxing family; to Robert Garcia for being by my side the entire camp,” dagdag ni Gesta (32-3-3, 17KOs).

Minsan ng naunsyami ang nakatakdang laban sana nito kay undefeated WBO-NABO at WBC silver lightweight champion Ryan Garcia (20-0, 17KOs) noong Hulyo 4 dahil hindi nagkasundo sa bayaran.

Umaasa ito na sakaling magwagi laban kay Tanajara ay magiging susi para sa isa na namang malaking laban, kung saan minsan na itong sumabak sa dalawang world title fight laban kina Migeula Vasquez para sa IBF lightweight title noong Disyembre 8, 2012 bilang undercard ng Manny Pacquiao vs Juan Manuel Marquez 4 at Jorge Linares para sa WBA lightweight bout noong Enero 27, 2018 sa The Forum, Inglewood, California. Nagresulta ang dalawang laban sa unanimous decision pabor sa mga kalaban ni Gesta.

Umaasa na lang si Gesta na muling matutuloy ang naunsyaming laban nito sa 23-anyos na si Tanajara (19-0, 5KOS) na idedepensa ang titulo sa ikatlong pagkakataon matapos mapanalunan ang bakanteng tiutlo laban kay Ivan Delgado ng US, at naipagtanggol kina Ezequiel Aviles at Juan Carlos Burgos.

“My apologies to [Hector] Tanajara and his team and hopefully our postponed fight can be rescheduled soon. I’ll be back in the gym soon and will continue to work hard,” pangako ng Pinoy boxer.