Drive thru booster shots sa mga 4-wheel vehicle owner, sisimulan ngayong araw sa Luneta

ni Jasmin Joy Evangelista | January 13, 2022

Magbibigay na ng booster shots via drive thru sa mga may-ari ng four-wheel vehicles ang Manila LGU simula ngayong araw.

“Due to the request of our constituents and the people, i-innovate natin itong vaccination drive-thru dito sa Luneta. Imbis na first and second dose lang, gagamitin natin siya ngayon na booster vaccination drive-thru site,” ani Manila City Mayor Francisco “Isko Moreno” Domagoso, habang nagsasagawa ng inspeksiyon sa Quirino Grandstand kung saan nagtayo ng drive-thru vaccination site ang Manila LGU.

“So ibig sabihin pwede jeep, taxi, private, o mga korporasyon, pwede po silang magtungo dito sa Luneta drive-thru vaccination site ng City of Manila,” dagdag niya.

Ayon kay Moreno, ang booster shot drive-thru ay first-come, first-served basis para sa unang 300 sasakyan na may maximum 5 recipients kada sasakyan.

Ito ay bukas sa publiko, maging sa mga hindi taga-Maynila, mula 8 a.m. hanggang 5 p.m.

“We welcome you to the City of Manila, basta tayo tulong-tulong muna. Ang importante, ma-booster ‘yung tao, mabakunahan ‘yung tao para maiwasan ang kamatayan sa impeksyon ng COVID19. Vaccination is the solution. That is the only way to protect yourself and your family,” paliwanag ng alkalde.

“So ngayon palalakasin pa natin, palalawakin pa natin, Yayakapin natin hangga’t kaya natin yakapin kahit sino, kahit taga-saan, basta ang importante, tao muna, mabuhay ang tao, maligtas ang tao,” dagdag pa niya.

As of January 11, nakapagturok na ng 198,454 booster doses ang Manila City government.