Dahil sa 'very unhealthy' air quality... Mga taga-Maynila, mag-face mask — LGU

ni BRT @News | April 27, 2026

Hinihikayat ang mga residente sa Lungsod ng Maynila na magsuot ng face mask dahil sa “very unhealthy” na kalidad ng hangin bunsod ng patuloy na sunog sa Navotas Sanitary Landfill.

Ayon sa Manila City Disaster Risk Reduction and Management Department (Manila City DRRM Department), batay sa kanilang air quality sensors, umabot sa mapanganib na antas ang polusyon sa hangin sa Maynila at mga karatig-lungsod pagsapit ng hatinggabi ng Abril 27.

Pinayuhan din ang publiko, lalo na ang mga malapit sa Puregold Tayuman, na manatili na lamang sa loob ng bahay kung hindi kinakailangang lumabas.

Patuloy pa ring nasusunog ang landfill at umabot na sa tinatayang 28.6 ektarya ang naapektuhan hanggang Abril 21, anim na araw matapos magsimula ang sunog.

Para ‘di magtaas-presyo... P25K para sa panadero — LGU

ni Mylene Alfonso @News | April 10, 2026

Photo: Yorme Isko Moreno Domagoso - FB

BIbigyan ng tig-P25,000 subsidiya ni Manila Mayor Isko Moreno ang kada bakery owner sa Maynila kapalit ng hindi pagtaas sa presyo ng tinapay sa loob ng 30 araw.

Ito ang inianunsiyo ni Moreno matapos na makipagpulong sa local community bakers sa Bulwagang Bayan, ng Manila City Hall, alas-10 ng umaga.

Kabilang ang pandesal, pandilimon, monay, Spanish bread, at iba pang tinapay na kinukonsumo sa araw-araw ng publiko.

Sa pakikipag-usap ni Moreno sa mga panadero, ibinahagi sa alkalde ang kabuuang production cost sa paggawa ng tinapay.

“Gusto kong matuto, kaya ko kayo pinatawag dahil gusto ko rin kayong tulungan, mga panaderya ng komunidad sa Lungsod ng Maynila,” ani Moreno.

“Ang pandesal is simbolo ng almusal ng pamilyang Pilipino — hindi ‘yan pang-mahirap lang ha, pati mayayaman,” aniya.

Iginiit ni Moreno na ang ibibigay na subsidiya ay hindi permanenteng solusyon sa lumalalang krisis.

“Lagapak tayo, pero ‘pag bagsak natin, may alpombra man lang na binigay ng pamahalaan — hindi masakit na masakit,” ayon pa kay Moreno.

Samantala, nagpasalamat naman si Asosasyon ng Panaderong Pilipino (APP) President Chito Chavez, na nagpahayag ng “Sa hinahaba kong naging panadero at sa mahigit 30 taon na tagapagsalita ng mga panadero, ngayon lang ako nakatikim na mayroong isang alkalde ng Maynila na ginawan kami ng pamamaraan para buhatin ang aming upuan.”

Lagusnilad underpass, bukas na ulit

ni Angela Fernando - Trainee @News | November 28, 2023

Inaasahang magiging maayos ang daloy ng trapiko sa Maynila sa muling pagbubukas ng bagong-rehabilitadong Lagusnilad vehicular underpass ngayong Martes.

Kinumpirma ni Manila Mayor Honey Lacuna na magiging malaki ang kaluwagan nito sa trapiko.

Matatandaang nagdulot ng mabigat na trapiko ang pagsasara ng Lagusnilad para sa rehabilitasyon nito na nagsimula nu'ng Mayo.

Kasama sa P75-milyong rehabilitasyon ang pag-aayos sa pumping system, daanan ng kanal, at pagkakumpuni ng mga butas sa kalsada.

Naglagay rin ng mga ilaw at solar studs ang mga awtoridad para sa seguridad ng mga motorista.

Samantala, ikinatuwa ng mga drayber ng Public Utility Vehicle (PUV) ang pagbubukas nitong muli dahil luluwag ang mga kalsada.