DOH, nagbabala sa pagbili at pagbenta ng convalescent plasma sa publiko

ni Lolet Abania | August 9, 2020

Nagbabala ang Department of Health (DOH) sa publiko patungkol sa pagbili at pagbebenta convalescent plasma bilang treatment sa coronavirus o covid-19 dahil ito ay labag sa batas at may panganib na kakaharapin.

“Trading blood and other blood products, including those from recovered COVID-19 patients, is not only illegal but highly dangerous," ayon sa pahayag ni Health Secretary Francisco Duque III.

"Convalescent plasma should not be for sale and should be voluntarily donated for COVID-19 patients in need."

Nag-isyu ng warning ang DOH, matapos na magkaroon ng mga report sa ahensiya ng ilang pamilyang bumibili umano ng blood plasma sa mga narekober sa covid-19, hospital staff o fixers upang maka-survive sa sakit ang kanilang kaanak na nasa kritikal ang kondisyon.

Gayundin, may report na sinasadya umano ng iba na ma-infect ng covid-19 upang maibenta ang kanilang plasma na nakarating sa DOH.

Ayon sa DOH, ang illegal na transaksyong ito ay may nakaambang panganib sa pasyente sakaling isagawa ito sa kanya dahil sa posibleng tamaan ng transfusion-transmissible infections tulad ng HIV, hepatitis at malaria.

Sa kasalukuyan, ang Philippine Blood Center lamang at ang Philippine Red Cross sa Port Area, Manila, na isang non-hospital facilities ang awtorisado na kumuha ng plasma, bukod pa sa Philippine General Hospital at St. Luke’s Medical Center.

Ayon pa sa DOH, ang convalescent plasma therapy ay patuloy nilang ini-evaluate at hindi pa rin bahagi ng standard care para sa mga COVID-19 patient.

"To date, there is no concrete evidence to show that it is effective against SARS-CoV-2," sabi sa statement.

Ipinaalala rin ng DOH sa publiko na ang lahat ng dugo at blood products na makukuha ay nanggagaling sa mga volunteer blood donors lamang, ayon sa Republic Act 7719 o ang National Blood Service Act of 1994.

Ipinagbabawal ang paid donation at ang pasilidad o ospital na magbabayad sa mga blood donors ay may kaukulang parusa ayon sa DOH Administrative Order No. 36 series of 1994 Chapter 7, Section 26 at Chapter 8, Section 41.

"DOH is calling on the aid of hospital chiefs to check their own staff if they engage in this practice and LGUs to investigate the trade of convalescent plasma outside the realm of authorized health facilities," ayon sa statement.

"Likewise, DOH is appealing to relatives of patients to stop dealing with fixers operating inside and outside the hospital."