'Di sapat ang dalamhati at galit sa mga karumal-dumal na krimen

by Info @Editorial | January 14, 2026

"Misis, kinatay ni mister."

"Estudyante, ginahasa, pinugutan."

"Batang lalaki, dinukot, pinagtataga."

Sobra na ang karumal-dumal na krimen sa bansa. Paulit-ulit ang balita ng pagdukot, panggagahasa at pagpatay.

Hindi sapat ang pakikiramay at galit sa social media. Ang kailangan ay agarang aksyon.

Dapat pabilisin ang imbestigasyon at tiyaking may napaparusahan. 

Kapag usad-pagong ang hustisya, lalo lang lumalakas ang loob ng mga kriminal. 

Hindi dapat palampasin ang kapabayaan.

Tigilan din ang paninisi sa biktima na para bang sila pa ang may kasalanan kung bakit naaabuso. 

Kailangan ding kumilos ang komunidad. Huwag manahimik kapag may nakikitang mali. Ang krimen ay hindi lang problema ng gobyerno—problema ito ng lahat.

Hindi na kailangan ng mahahabang paliwanag. Kailangan ng matibay na batas, mabilis na hustisya, at totoong malasakit. 

Higit pa sa paghuli sa salarin, dapat ding tanungin kung bakit patuloy na umuusbong ang ganitong karahasan. 

Nasaan ang sapat na serbisyong panlipunan? Nasaan ang pag-aaruga sa kabataan? Nasaan ang matibay na ugnayan ng komunidad at paglaban sa masasama? 

Kung patuloy nating babalewalain ang mga ugat ng krimen, paulit-ulit nating aanihin ang parehong trahedya.