Dagdag-suweldo sa health workers, madaliin na

@Editorial | November 6, 2021

Mula sa P33, 575 ay inihihirit na gawing P60, 901 ang starting monthly base pay ng mga nurse na nagtatrabaho sa mga government hospital.

Ito ang nakapaloob sa House Bill 7933 na isinusulong ngayon sa Kongreso.

Sa gitna ng dinaranas na pandemya, napag-alamang 5,957 nurses ang nagbabalak na maipagpatuloy ang propesyon sa Amerika matapos kumuha ng U.S. licensure examination sa unang pagkakataon mula Enero hanggang Setyembre 2021.

Mas mataas ito nang 25 porsiyento kumpara sa bilang ng nursing graduates na kumuha ng National Council Licensure Examination (NCLEX) sa unang pagkakataon sa kaparehong buwan noong 2020, batay sa datos ng U.S. National Council of State Boards of Nursing Inc.

Inaasahang darami pa ang Pinoy nurses na lilipat sa U.S. dahil sa mataas na suweldo.

Sa California, ang isang registered nurse ay nakakatanggap umano ng average na $120,560 o P6.1 milyon kada taon.

Ito ang katotohanan sa sitwasyon ng mga health workers sa bansa. Gustuhin man nilang maglingkod sa bayan, paano naman ang kanilang pangangailangan at ng kanilang pamilya?

Kaya patuloy na magiging hamon sa ating gobyerno ang paggawa ng mga paraan upang mas matutukan ang kanilang mga karapatan at pangangailangan.

Matatandaang nagbabala na rin ang Private Hospitals Association of the Philippines (PHAP) na ilang Filipino nurses ang umaalis ng bansa para sa overseas jobs, kaya nitong Oktubre pa lamang, umabot sa 10 porsiyento ng nursing staff ng maraming ospital ang nawala.

Sana, huwag naman umabot na halos wala nang matirang health workers sa ating bayan. Ngayon pa lang ay aksiyunan na.