Batang 'di bakunado, puwede sa face-to-face classes

@Editorial | March 3, 2022

Kasunod ng pagsasailalim sa 'new normal' sa National Capital Region (NCR) at iba pang mga lugar sa bansa, balik-face-to-face classes na rin.

Kaugnay nito, nilinaw ng Department of Education (DepEd) na hindi required ang mga batang mag-aaral na magpabakuna kontra-COVID-19 para sa face-to-face classes.

Hindi ito mandatory, lalo na't nasa pagpapasya ng magulang kung patuturukan ang anak o hindi.

Gayunman, hinihikayat pa rin ng pamunuan ng DepEd na pabakunahan ang mga bata, kahit pa mas malakas ang immunity ng mga ito laban sa COVID-19. Matatandang, batay sa mahigit 15,000 estudyante na lumahok sa pilot phase ng in-person classes noong November hanggang December, walang nag-positive sa virus.

Samantala, required naman ang mga teaching and non-teaching personnel na magpabakuna para sa in-person classes.

Ang mga unvaccinated personnel ay puwede pa ring magtrabaho sa bahay o mag-COVID test bago mag-report sa trabaho.

Nakakatuwa na unti-unti na tayong nakakabalik sa mga dating gawain, bagama't kailangan pa ring mag-ingat.

Palagi nating paalalahanan ang bawat isa, lalo na ang mga bata na maging maging responsable at maingat habang nasa labas ng bahay o nasa paaralan.

Ipaunawa natin sa kanila ang kahalagahan ng pagiging malinis sa katawan at ang pag-aalaga sa sarili para makaiwas sa anumang uri ng sakit.

Sana maging matagumpay ang unang dalawang linggo sa ilalim ng Alert Level 1 para magtuluy-tuloy na ito.

Kailangan na talaga nating sabayan ang pandemya. Tapusin na natin ang mga panahon na palagi tayong nangangamba at nasasakripisyo na lang ang mahahalagang bagay tulad ng edukasyon.