Balik-coding sa pribadong sasakyan

@Editorial | November 30, 2021

Grabe na naman ang trapik!

Nangangahulugan lang ‘to na talagang nagbabalik na ang sigla ng ekonomiya. Marami nang lumalabas, nagtatrabaho, namimili at namamasyal.

Ang problema, tumitindi na naman ang trapik at marami rin ang naaabala.

Bilang solusyon, pumayag na ang mayorya ng mga alkalde sa National Capital Region (NCR) na ibalik na ngayong linggo ang number coding scheme tuwing rush hour sa hapon.

Ayon sa Metropolitan Manila Development Authority (MMDA), iiral ang number coding scheme mula Lunes hanggang Biyernes, alas-5: 00 ng hapaon hanggang alas-8: 00 ng gabi.

Tanging mga pribadong sasakyan lang ang apektado sa naturang implementasyon at hindi kasama ang mga public utility vehicles (PUVs).

Kahit paano ay mababawasan ang trapik at mapabibilis ang biyahe.

Mas malaking tulong din kung palaging disiplinado ang mga drivers at commuters. Kung lahat ay sumusunod sa batas-trapiko, maiiwasan ang banggaan at paninita na nakadaragdag-bara sa kalsada.

Hindi lang kabuhayan ang nalalagay sa alanganin dahil sa trapik kundi nalalantad din sa kapahamakan ang buhay ng mga lansangan.