ni Nympha Miano-Ang - @Life and Style | January 15, 2021
Unang natuklasan ang bagong variant ng coronavirus disease sa United Kingdom noong 2020 at muli na naman itong ikinabahala sa buong mundo.
Ayon sa special feature ng Medical News Today, ano nga ba ang kaibhan ng SARS-CoV-2 na nagdadala ng COVID-19 at Ang tinatawag na B.1.1.1.7 na virus variant? Noong Setyembre 2020, naispatan ang B.1.1.7 sa U.K. Binigyang pansin ito ng mga siyentipikong Briton at gobyerno sa unang bahagi ng Disyembre nang ianunsiyo ni U.K. health secretary, Matt Hancock na napakabilis nitong kumalat at dumoble pa ang bilang ng mga na-infect sa SARS-CoV-2 sa South England.
Buong mundo ay nagulat at nabahala na naman. Tinanong kung ano ang kaibhan ng COVID-19 strains pagdating sa panghahawa nito sa bawat tao? Mas grabe ba ito sa COVID-19? Delikado ba ito sa mga bata at matatanda? Nabanggit sa unang pag-aaral na ang bagong variant ay mas mataas ang tsansa na mabilis makahawa.
Isang pag-aaral ng medRxiv noong Dis. 26, 2020, gumamit sila ng mathematical modeling upang maestima ang bilis ng hawahan sa bagong variant kumpara sa “preexisting variants of SARS-CoV-2.” Ayon sa konklusyon ng isang team ng researchers mula sa LSHTM, ag B.1.1.7 variant “is 56% more transmissible” than other SARS-CoV-2 variants.
Ang tanong din na kung ang mga bakuna ba ay may panlaban sa bagong variant? Sinagot ng Public Health England na wala pang ebidensiya na ang lahat ng COVID-19 vaccines ay hindi magbibigay proteksiyon laban sa 'mutated virus variants.'
Kumalat na rin ang variants sa mga bansang Switzerland, Finland, Australia, Zambia at France.
Sinasabi rin ng mga siyentipiko na ang variant ay mas mabilis makahawa pero hindi naman nakamamatay at hindi lumubha ang sakit ng isang taong maiimpeksiyon.
Dito sa Pilipinas, nakumpirma nitong Miyerkules ang unang kaso ng bago at mas nakahahawang coronavirus variant na unang nadiskubre sa Britain.
Ayon sa Department of Health (DOH) and Philippine Genome Center (PGC) ang coronavirus variant B.1.1.7. ay dala ng isang Pinoy na dumating noong Enero 7 mula sa United Arab Emirates na bansang madalas dayuhin ng mga Briton.
Umalis ang pasyente sa Dubai noong Dis. 27, 2020 para sa isang business trip at dumating sa Pinas sakay ng Emirates flight. May kasamang babae ang pasyente pero negatibo sa virus, dagdag ng DOH. "Both of the returning Filipinos had no exposure to a confirmed case prior to their departure to Dubai nor had any travel activities outside Quezon City," saad ng DOH na tinutukoy na tanging sa naturang lungsod lang ito dumiretso.
"Immediate contact tracing was done, and the initially identified contacts are asymptomatic and currently under strict home quarantine," paliwanag pa ng DOH.
Hindi na pinapayagan ngayon ng Pilipinas ang mga biyaherong makapasok sa bansa partikular na ang may travel history sa Britain at iyong mula sa 32 iba pang mga bansa at rehiyon upang maiwasan na muli ang pagkalat ng bagong strain na B.1.1.7 sa bansa.
Ang Pilipinas ngayon ay may naitalang 492,700 na kumpirmadong kaso ng COVID-19 at may kabuuan nang 9,699 ang nasasawi.