para ‘di maudlot ang suwerte
ni Maestro Honorio Ong - @Forecast | May 10, 2022
Ipagpatuloy natin ang pag-aanalisa sa pangunahing ugali, katangian at kapalaran ng animal sign na Pig, Boar o Baboy ngayong Year of the Water Tiger.
Kung ikaw ay isinilang noong taong 1947, 1959, 1971, 1983, 1995, 2007 at 2019, ikaw ay mapabibilang sa animal sign na Boar, Pig o Baboy.
Ngayong 2022, susuwertehin ang Baboy sa halos lahat ng aspeto ng kanyang buhay. Maraming biyaya silang matatanggap, at unang-una mula sa kanilang mga mahal sa buhay, partikular ang kanilang mga magulang at kapatid, karelasyon o asawa, at maging sa kanilang mga kaibigan at espesyal na karelasyon.
Dagdag pa rito, aangat din ang kanyang career at kabuhayan sa buong taon at tulad ng nasabi na, ang pag-angat ng kabuhayang ito at pag-asenso sa career ay ibibigay ng kanilang mga mahal sa buhay. Bukod sa mga kadugo o kamag-anak, ang kanilang mga kaibigan o sirkulo ng lipunan na kanilang ginagalawan ay mag-aambag din ng malaking bulto ng suwerte upang tuloy-tuloy na umunlad at sumagana ang aspetong kabuhayan ng Baboy sa taong ito ng 2022.
Ibig sabihin, maraming tulong ang ipagkakaloob ng mga taong malalapit sa Baboy sa buong 2022. Hindi lang mga kabigan at kamag-anak o kapamilya ang tutulong sa kanila kundi pati na rin ang langit. Ang kamay ng nasa itaas ay lalawit mula sa langit upang sila ay abutan ng mga biyaya at hindi masukat na pagpapala na may kaugnayan sa materyal na bagay. Kaya iminumungkahi na lalo pang makipagkaibigan ang Baboy ngayong Year of the Water Tiger, at lalong paigtingin ng Baboy ang kanyang pag-ibig at pakikiugnay sa kanyang mga mahal sa buhay at ang paglalabas-labas ng bahay, upang ang lahat ng suwerte at magagandang kapalaran ay walang tapon niyang makuha sa ngayong taon.
Kaya kung may hindi pagkakaunawaan sa pamilya o kabigan na magdudulot ng samaan ng loob, dapat itong iwasan ng Baboy o sawatain niya agad. Dahil ang mga sigalot na ito ang maaaring maging pangunahing hadlang upang ang magagandang kapalarang nabanggit sa itaas ay hindi agad makarating sa kanyang karanasan.
Samantala, bukod sa kulay na yellow o dilaw, mapalad din ang Baboy sa kulay na silver at gray ngayong 2022.
Kung nais namang makipagsapalaran sa anumang uri ng number games, maaaring subukan ng Baboy ang kumbinasyon ng mga numerong 2, 11, 17, 26, 33, ganundin ang kumbinasyong 42 sa 5, 15, 27, 36, 45, 51, higit lalo sa mga araw ng Lunes, Martes, Sabado at Linggo.
Kusa namang iigting ang mabuting kapalaran ng Baboy mula sa ika-19 ng Hunyo hanggang sa ika-27 ng Hulyo, mula sa ika-19 ng Oktubre hanggang sa ika-27 ng Nobyembre at mula sa ika-18 ng Pebrero hanggang sa ika-27 ng Marso 2023.