Akala raw, sore eyes lang…COVID NI SEN. BONG, NAGSIMULA SA PAMUMULA NG MATA

ni Vinia Vivar - @Frankly Speaking | August 11, 2020

Matapos umaming COVID-19 positive last Sunday, kahapon ng umaga ay humarap sa camera si Sen. Bong Revilla, Jr. sa kanyang Facebook Live session para magbigay ng update sa kanyang kondisyon.

Bagama’t medyo madilim ang video, makikitang medyo hirap ding huminga si Sen. Bong, although nakakapagsalita naman siya nang mahahaba, pero panaka-naka ay umuubo siya.

Mag-isang naka-isolate si Sen. Bong sa isang room at aniya, bagama’t napakahirap ng kanyang kondisyon ay lalaban daw siya.

Ibinahagi niya ang nararamdaman na giniginaw siya, nilalagnat at masakit daw kapag hinahawakan niya ang kanyang ulo. Kapag inuubo raw siya ay masakit din sa ulo.

Ikinuwento ni Sen. Bong ang unang sintomas na naramdaman niya na namumula raw ang kanyang mga mata’t inakala pa nilang sore eyes. Ipina-check pa raw niya sa ophthalmologist ang kanyang mga mata at sinabi nga raw sa kanya na posibleng sintomas ng COVID-19 'yun.

Hindi pa nga raw siya naniwala dahil feeling niya ay sore eyes o allergy lang sa mata ang sakit niya. Gayunpaman ay nag-isolate na raw siya agad at nagpa-swab test.

Nauna nang ibinalita ni Sen. Bong na thank God at negative naman ang misis niyang si Lani Mercado at mga anak niya. Pero may isa siyang tauhan na nag-positive rin.

Sa ngayon ay nagte-take raw siya ng antibiotic at Vitamin C.

“Hirap pala nito, walang makatulong sa ‘yo, bagsak ka. Pero ganunpaman, eto, lalaban po ako. COVID lang ito, kailangang labanan natin ‘to,” aniya.

Aniya ay hindi niya puwedeng asahan ang kanyang pamilya ngayon dahil siyempre ay hindi dapat mahawahan ang mga ito. Kaya mag-isa lang niya talagang gagamutin at aalagaan ang sarili.

Nabanggit nga rin ni Sen. Bong na katatapos lang ng isang matinding dagok nang mamatay ang kanyang amang si Sen. Ramon Revilla, Sr., ngayon ay may kasunod na namang pagsubok.

“Pero sabi nga, eh, if it’s your time, it’s your time. 'Pag tinawag ka na ng Panginoon, time to go, you go. So, I prayed last night, bago ako matulog. Sabi ko nga, ‘Lord, total surrender ako sa Iyo, ever since. Kayo na po ang bahala sa akin. Alam kong hindi Ninyo ako pababayaan,’” pahayag ng aktor-pulitiko.

Nagpasalamat din si Sen. Bong sa lahat ng nagdarasal para sa kanya at aniya ay kailangan pa raw niya ng maraming prayers.

“Dasal, I need prayers sa inyong lahat po. Mga kababayan, ipagdasal n’yo na lang po ako at ang aking pamilya,” aniya.

Isa kami sa mga nananalangin na sana ay malampasan ni Sen. Bong ang pagsubok na ito.