60,000 Pinoy babies, namamatay bago mag-5 yrs. old 

ni Nancy Binay @Be Nice Tayo | January 18, 2023

Malagim ang ulat na inilabas kamakailan ng United Nations Inter-agency Group for Child Mortality Estimation (UN IGME) tungkol sa mga batang Pilipino.

Ayon sa UN IGME nasa 60,000 batang Pinoy ang namatay bago ang kanilang ika-5 kaarawan dahil sa mga komplikasyon dala ng premature birth, intrapartum complications at nakahahawang sakit.

Dagdag pa ng ulat, halos 60 percent ng mga namatay bago ang kanilang 5th birthday ay bagong silang. Mahigit 25,000 sanggol ang stillborn kada taon.

Ang mungkahi ng UN IGME, palawakin pa ang access sa quality maternal and child health and nutrition services, tutukan ang immunization ng mga bata at tuparin ang mga commitment sa pagsiguro ng kalusugan sa first 1,000 days ng mga bata upang lumaki silang malakas.

☻☻☻

Bilang isa sa mga awtor ng First 1000 Days law (Republic Act No. 11148), nababahala tayo sa mga datos ng ulat ng UN IGME.

Kinakailangang matukoy natin kung saan ba tayo nagkukulang sa implementasyon ng batas na nagsusulong sa kapakanan at kalusugan ng batang Pinoy, at umaksyon agad upang masigurong natutupad natin ang layunin ng batas.

Maging wake-up call sana ang ulat na ito nang mapagtanto nating marami pa ang kailangang gawin para sa kapakanan ng kabataan.

☻☻☻

Marami sa mga kababayan natin ang nadismaya sa resulta ng Miss Universe 2022.

Nabigo si Bb. Celeste Cortesi na makapasok sa Top 16. Ito ang unang beses mula 2010 na nabigong makapasok sa semi-finals ng pageant ang pambato ng Pilipinas.

Ngunit anuman ang naging resulta, ipinagmamalaki pa rin natin si Celeste dahil sa kanyang dedikasyon sa pagbandera ng ating bansa.

Celeste, maraming salamat sa effort. Babawi tayo.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin