Kita ng korporasyon, exempted ba sa pagpapatupad ng desisyon ng kaso?

Dr. Persida V. Rueda-Acosta / Magtanong Kay Attorney

Dear Chief Acosta,

Nanalo kami sa kasong isinampa namin laban sa ahensiya (isang korporasyon) na pinapasukan namin. Gawa na naabutan ng lockdown at sa kadahilanang wala na rin ang abogadong tumulong sa amin nang libre ay natatakot kami sa sinabi ng representante ng dating pinapasukan namin. Ayon sa representante ay sa papel lang ang panalo namin sapagkat exempted diumano ang kita ng kanilang korporasyon sa mga nakaraang apat na buwan sa execution ng judgment at gawa na tanging ito na lang din diumano ang kanilang ari-arian ay sinasabi niyang wala na ring maipatutupad na desisyon. Totoo ba na exempted ang nasabing kita sa execution? – Greg

Dear Greg,

Ang sagot sa inyong katanungan ay hindi po. Bagama’t nakalagay sa ating Rules of Court at sa katulad na probisyon sa National Labor Relations Commission (NLRC) Manual on Execution of Judgment na ang kita ng isang judgment obligor sa nakaraang apat (4) na buwan bago ipataw ang execution ay exempted, malinaw naman din na nakasaad na ito ay may limitadong aplikasyon lamang, viz:

“SECTION 13. Property exempt from execution. - Except as otherwise expressly provided by law, the following property, and no other, shall be exempt from execution:

x x x

(i) So much of the salaries, wages or earnings of the judgment obligor for his personal services within the four months preceding the levy as are necessary for the support of his family. '

x x x.”

Base sa nakasaad na probisyon, kaya na-exempt ang mga nabanggit na kita at suweldo ay para makasuporta ang judgment obligor sa pamilya. Dahil dito, sapagkat ang aplikasyon ng exemption ay para sa pamilya ng isang tao, masasabi nating tanging natural person lamang ang maaaring gumamit ng mga naturang exemptions at hindi ang isang juridical person tulad ng ahensiyang korporasyon sa iyong kaso.

Sa katunayan, sa kasong D’ Armoured Security and Investigation Agency, Inc. vs. Orpia (G.R. NO. 151325, June 27, 2005) na isinulat ni Honorable former Associate Justice Angelina Sandoval-Gutierrez, nilinaw ng Korte Suprema na ang mga exemptions sa execution ay hindi maaaring gamitin ng juridical person:

“In this context, exemptions under this rule are confined only to natural persons and not to juridical entities such as petitioner. Thus, the rule speaks of salaries, wages and earning from the 'personal services' rendered by the judgment obligor. The rule further requires that such earnings be intended for the support of the judgment debtor's family. Necessarily, petitioner which is a corporate entity, does not fall under the exemption. If at all, the exemption refers to petitioner's individual employees and not to petitioner as a corporation.” (Binigyang-diin)

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa mga naisalaysay sa ninyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.