Online seller, 3 pa timbog sa P16.6-m shabu

Nasa sa P16.6 milyong halaga ng ilegal na droga ang nasamsam sa apat na hinihinalang bigtime drug personalities sa buy-bust operation sa Caloocan City, Biyernes ng gabi.

Iniharap ni Caloocan Police Chief Col. Dario Menor kina Mayor Oscar “Oca” Malapitan at Northern Police District (NPD) Director P/Brig. Gen. Ronaldo Ylagan ang mga naarestong suspek na sina Salahudin Abedin alyas Boss, 35; Jamal Mustapha, 36, muay thai instructor; Asnihaya Disomimba, 30, online seller at Misaly Mustapha alyas Sally, 34, pawang mga residente ng Bgy. 188, Tala.

Alas-8:00 ng gabi nang isagawa ng mga operatiba ng Caloocan Police Station Drug Enforcement Unit (SDEU) ang buy-bust operation kontra sa mga suspek sa Abdulasis St. matapos ang isinagawang surveillance operation.

Matapos tanggapin ng mga suspek ang marked money mula sa pulis na nagpanggap na buyer kapalit ng isang medium transparent plastic bag ng shabu ay agad sinunggaban ang mga ito ng mga operatiba.

Narekober sa mga naarestong suspek ang 25 medium knot tied transparent plastic bag na naglalaman ng nasa 2 kilos at 450 grams ng shabu na tinatayang nasa P16,660,000 ang halaga at limang P1,000 bill kasama ang 47 piraso ng 1,000 fake/boodle money.