Bagong seaport sa Pag-Asa Island, mag-o-operate na sa June 12 — DOTr

Kinumpirma ni Transportation Secretary Arthur Tugade na nakatakdang magbukas sa Hunyo 12 ang bagong seaport sa pinagtatalunang Pag-Asa Island sa Palawan.

Sa isinagawang pulong ng Inter-Agency Task Force for the Management of Emerging Infectious Diseases kagabi sa Palasyo, sinabi ni Tugade kay Pangulong Rodrigo Duterte na hindi magsasagawa ng inauguration ceremony para sa nasabing P450-million seaport.

"Sabihin ko na rin ho, Mr. President, sa maritime. Nakatapos na ho kami at ni-report namin sa IATF kahapon ito na natapos na kami ng puerto at gusto nilang inaugurate-in pa. Sabi ko wala nang inaugurate-inaugurate, operate-in mo na lang. Mahigit 10 na ho ‘yan, operate-in mo na lang. Wala na tayong opera — inauguration-inauguration…," sabi ni Tugade kay P-Duterte na agad sinegundahan na ayaw na nito nang may seremonya pa.

"Oo, basta operate-in mo na lang. Kasama ho diyan ‘yung pagtatapos nung puerto sa Pag-asa. Handa na hong mag-turnover ‘yung Provincial Government of Palawan na i-turnover sa amin ‘yon sa June — June 12," wika naman ni Tugade.

"Sabi ko kung maaari accept-in ko na lang sa papel ‘yan. Huwag na tayo mag-inaugurate. Umpisahan na lang natin," pahayag pa ng Kalihim.

Matatandaang noong November 2016, nagdesisyon ang kasalukuyang administrasyon para sa pagpapatayo ng seaport sa Pag-Asa Island na isa sa pinakamalaking isla sa Pilipinas sa pinag-aagawang Spratly Group of Islands sa West Philippine Sea kung saan mayroon itong 400 residente na ang ikinabubuhay ay ang pangingisda.