Libre ba ang postal services para sa mga PWD?

Dr. Persida V. Rueda-Acosta / Magtanong Kay Attorney

Dear Chief Acosta, Ako ay Person with Disability (PWD) na nagbebenta ng mga kagamitang panturo para sa mga katulad kong PWD. Mayroong nais bumili sa akin sa ibang bansa at nais ko itong maipadala roon. Libre ba ang pagpapadala nito? - Lorena

Dear Lorena, Para sa inyong kaalaman, nakasaad sa Section 24 ng Republic Act (R.A.) No. 7277 o mas kilala bilang “Magna Carta for Disabled Persons” na:

“SECTION 24. Free Postal Charges for the Disabled- Postal charges shall be free on the following:

(a). article and literature like books and periodicals, orthopedic and other devices, and teaching aids for the use of the disabled sent by mail within the Philippines and abroad; and

(b). aids and orthopedic devices for the disabled sent abroad by mail for repair;

Provided, That the aforesaid items are for personal purposes only: Provided further, That the disabled person is a marginalized disabled as certified by the Social Welfare and Development Office of the local government unit concerned or the Department of Social Welfare and Development.” (Binigyang-diin)

Sa inyong sitwasyon, dahil sa ang kagamitan na inyong nais ipadala ay hindi pampersonal na konsumo, bagkus ay nais ninyo itong ibenta, hindi ito maaaring ikonsidera na libre sang-ayon sa batas na nabanggit sa itaas.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa isang abogado.