Pagpunta ng mga tao sa mall, hindi maituturing na dagsa — DTI

Itinanggi ni Trade and Industry Secretary Ramon Lopez ang ulat na dinagsa ng mga ang tao ang mga mall na pinayagan ang partial operation sa ilalim ng modified enhanced community quarantine.

Sa virtual hearing ng House Defeat COVID-19 Ad Hoc Committee-New Normal Cluster, sinabi ni Lopez na sumama siya mismo sa inspeksiyon sa mall nitong weekend at hindi naman aniya ganun karami ang mga tao kumpara sa normal na sitwasyon noon.

Nagsagawa rin aniya sila ng quick survey at lumalabas na dalawampung porsiyento lamang ng normal na dami ng mga tao sa mall kung Linggo ng hapon ang kanilang na-monitor kahapon, Mayo 17.

Bagamat maraming store na ang nagbukas, nasa 20 porsiyento lamang din ito ng kabuuang mga establisimyento sa mall.

"We checked personally some malls in the metropolis na usually on a Sunday afternoon, punung-puno ng tao [and] we can see na hindi naman ganun karami ang tao. While we were interviewing, doing a quick survey, the crowd is only about 20% of what a typical Sunday afternoon pre-COVID times. It's just about 20%," ani Lopez.

"The number of stores open actually. And despite some of the stores allowed to open, only about 20% also have opened up," dagdag nito.

Nilinaw din ni Lopez na sa pagbubukas ng mga mall sa Metro Manila, mahigpit na ipinatutupad ang quarantine protocols tulad ng physical distancing at pagsuot ng face mask.

Katuwang ang iba pang ahensiya ng pamahalaan, tiniyak ni Lopez na nababantayan ang mga nagbukas na establisimyento kung sila ay nakasusunod sa mga panuntunan ng new normal sa gitna ng COVID-19 pandemic.