Remdesivir, aprubado na ng FDA kontra COVID-19

Nag-isyu ang Food and Drug Administration (FDA) ng emergency use authorization para sa Gilead Sciences’s antiviral drug na Remdesivir sa mga pasyenteng naospital at dumaranas ng matinding sakit dahil sa COVID-19.

Inaprubahan kahapon ng ahensiya ang gamot, kasabay ng anunsiyo ni President Donald Trump, dalawang araw matapos makausap si Anthony S. Fauci, top infectious disease expert ng bansang ito, na nagsasabing sa trial data na ginawa, ang drug ay nagpapakita ng “clear cut, significant, positive effect in diminishing the time to recovery.”

“That is really quite important,” sabi ni Fauci, director ng National Institute of Allergy and Infectious Diseases, na siya ring nangangasiwa sa pagsusuri ng mahigit sa 1,000 pasyente sa United States at buong mundo.

Ayon sa FDA, ang emergency use authorization ay pagbibigay ng pahintulot para sa Remdesivir na maipamahagi ito sa Amerika at i-administer intravenously ng mga healthcare worker upang gamiting gamot kontra covid-19 na tumama sa mga matatanda maging sa mga bata na naospital at dumaranas ng matinding sakit na ito. Kapag ang pasyente ay nagkaroon ng matinding sakit na ito, nakararanas sila ng low blood oxygen levels o nangangailangan ng oxygen therapy o higit na intensive breathing support tulad ng mechanical ventilator.

“Today’s action is an important step in our efforts to collaborate with innovators and researchers to provide sick patients timely access to new therapies where appropriate, while at the same time supporting research to further evaluate whether they are safe and effective,” sabi ni FDA Commissioner Stephen Hahn.

Gayundin, ang anunsiyo ni President Trump para sa unang authorized therapy laban sa covid-19 ay naganap sa pulong sa Oval Office kasama si Hahn, iba pang opisyal at si Daniel O’Day, chief executive ng Gilead, ang kumpanyang nagdebelop ng drug kontra Ebola. Agad namang nagpalabas ng pahayag ang FDA upang pormal na ianunsiyo ang naging desisyon.

Ayon kay President Trump, ito ay “promising situation to treat people who are not doing well.”

Sa isang television interview, sinabi ni O’Day na nakahanda na ang kumpanya para sa gamot upang ibigay sa libu-libong pasyente sa lalong madaling panahon.

“We’re all focused on making sure that we make this accessible and affordable to patients around the globe,” sabi ni O’Day sa NBC.