Partial operations ng mga bus at tren, pinag-aaralan na — DOTr

Pinag-aaralan ng gobyerno na ipatupad ang partial operations ng mga bus at tren sa Metro Manila sa gitna ng ipinatutupad na enhanced community quarantine sa Luzon.

Ayon kay Transportation Secretary Arthur Tugade, inumpisahan nang talakayin ng Inter-Agency Task Force for the Management of Emerging Infectious Diseases noong Lunes ang bahagyang pagbabalik ng public transportation.

Sakaling payagan aniya ng IATF na bumiyahe na ang mga bus at tren ay titiyakin lamang na hindi nalalabag ang social distancing upang mapigilan ang pagkalat pa ng Coronavirus Disease 2019.

“Kung papayagan po ng IATF magpa-partial operability tayo pero ‘yung operational capacity will be abbreviated upang ma-maintain ‘yung patakaran ng Department of Health sa social distancing,” ani Tugade sa virtual Laging Handa public briefing.

"Sakaling magbalik ang operasyon, 30 percent lang ng passenger capacity ng mga bus at tren ang papayagan para masunod pa rin ang physical distancing," wika pa ni Tugade.

Dapat pa rin aniyang ipatupad ang no mask, no entry at thermal scanning sa mga pasahero.

Pinag-aaralan din ng DOTr ang posibilidad na payagan na ipagpatuloy ang operasyon ng inter-island ferry.