Iwas-modus ngayong ECQ: Bank account at password, huwag ibigay

Nakapagtala ang National Bureau of Investigation (NBI) at Bangko Sentral ng Pilipinas (BSP) ng pagtaas ng 100 porsiyento ng mga kaso ng phishing matapos ang pagdami ng online transactions dahil sa umiiral na enhanced community quarantine (ECQ) sa Luzon.

Dahil dito, nagbabala si Cabinet Secretary Karlo Nograles, spokesman ng Inter-Agency Task Force for the Management of Emerging Infectious Diseases sa pagbibigay ng detalye ng kanilang bank account sa online.

“While this has helped many of us cope with the limitations brought about by the ECQ, the National Bureau of Investigation Cybercrime Division and Bangko Sentral ng Pilipinas report a 100% increase in phishing cases… and warn everyone to be cautious when it comes to your bank details,” sabi ni Nograles.

"Bale ang modus operandi ng phishing ay may taong magpapanggap na empleyado ng bangko mo at hihingin nila ang detalye ng account mo tulad ng account number o password,” paliwanag ni Nograles.

“'Wag nyo pong ibigay; hindi po hihingin ng bangko n'yo 'yan kahit kelan man, kahit sa anumang pagkakataon," saad ng Kalihim.

Kaugnay nito, nagbabala rin ang opisyal sa publiko hinggil sa pagbibigay ng donasyon sa pamamagitan ng online.

“Wina-warn din po tayo na mag-ingat po sa mga humihingi ng donasyon online; may mga kriminal na nagpapanggap na kasapi sa mga respetadong institusyon. We encourage everyone to double-check and verify these requests for donations," dagdag pa nito.