7-anyos, gumaling sa COVID-19

Isang pitong taong gulang na lalaki na taga-Zamboanga del Sur ang gumaling sa Coronavirus Disease.

Kaugnya nito, zero-case na ngayon sa COVID-19 ang nasabing probinsiya.

Sa pahayag ni Jesrel Himang ng Zamboanga del Sur Task Force COVID-19, natanggap ng Department of Health Regional Office 9 nitong Lunes ang pangalawang Reverse Transcription Polymerase Chain Reaction o RT-PCR test ng batang pasyente na taga-Dumalinao kung saan nagnegatibo na ito sa virus.

Bagama't nakauwi na ang bata, inabisuhan pa rin ng mga doktor ang mga magulang nito na mag-home quarantine ng 14 na araw.

Napag-alaman na may travel history ang bata at pamilya nito sa Iligan City, kung saan may naiulat ding mga kaso ng COVID-19.

Noong nakaraang linggo naman nakalabas sa Zamboanga del Sur Medical Center ang isang medical doctor at sundalo ng 1st Tabak Division matapos gumaling mula sa COVID -19.

Gayunman, bagama't wala ng kaso ng COVID-19 ang probinsiya, magpapatuloy pa rin umano ang pagpapatupad ng enhanced community quarantine.