Isa pang pulis patay sa virus... Edad 46 pataas, 'di na isasabak vs. COVID-19 — PNP

Nalagasan na naman ang Philippine National Police (PNP) ng isang miyembro nito matapos tamaan ng Coronavirus Disease 2019.

Ayon kay PNP Chief Police General Archie Francisco Gamboa, pumanaw na ang pulis na positibo sa COVID-19 kagabi.

"As a matter of fact, last night we lost one. Namatayan kami ng isang positive. He was not able to survive it," pahayag ni Gamboa.

Batay sa huling data ng PNP, nasa 11 ang pulis na positibo sa COVID-19 habang 209 ang itinuturing na persons under investigation (PUIs) at nasa 1,600 ang persons under monitoring (PUMs).

Sinabi ni Gamboa na karamihan sa mga PUIs at PUMs ay walang sintomas ngunit pinaniniwalaang may exposure sa taong hinihinalang positibo sa virus.

Samantala, binanggit din ni Gamboa na may isang police colonel ang isinugod sa ospital kagabi matapos mahirapang huminga.

"Last night also, a colonel was brought to a hospital dahil hirap na rin siyang huminga. But of course, this is a sad story on the part of the PNP but nevertheless we have to do our duty also," dagdag pa ng heneral.

Kasabay nito, sinabi ng PNP chief na upang maprotektahan ang kalusugan at kaligtasan ng mga tauhan nito, inatasan niya ang mga police unit na mag-deploy ng mga pulis na may edad na 45 taong gulang pababa.

"We discouraged deployment of personnel who are at least 46, 47 up years old... Hindi na namin sila sinasabak... we encourage 45 below," ani Gamboa.