Mayor Vico, walang nilabag na batas — DILG

Walang nakikita si Interior Secretary Eduardo Año na paglabag ni Pasig City Mayor Vico Sotto nang naisin nitong mapayagan ang pagbiyahe ng mga traysikel sa gitna ng umiiral na lockdown sa Luzon dahil sa paglaganap ng Coronavirus Disease 2019.

Kasunod ito ng pagpapatawag ng National Bureau of Investigation (NBI) kay Sotto kaugnay umano ng pagsuway nito sa itinatadhana ng Bayanihan to Heal As One Law.

"Para sa akin, wala naman siyang violation doon dahil noong nalaman niya na hindi pinayagan, hindi naman siya tumuloy," ani Año.

Hindi agad sumunod noon si Sotto sa direktiba ng gobyerno na suspindihin ang biyahe ng lahat ng pampublikong transportasyon sa Luzon bilang bahagi ng mga panuntunan ng enhanced community quarantine.

Gayunman nang mapagsabihan si Sotto na sumunod at nang makahanap ng alternatibong paraan upang maihatid at sundo ang mga health workers at residenteng may emergency sa kanilang lungsod, itinigil na nito ang pagpapabiyahe sa mga traysikel.

Sa kabila nito, naniniwala si Año na kayang idipensa ni Sotto ang kanyang sarili sa sandaling tuluyan siyang kasuhan ng NBI.

"Ako naman naniniwala na Mayor Vico can fully explain and defend himself if ever there is a charge against him," ayon sa kalihim.