P47-M gastos ng gobyerno para safe sa COVID-19 ang mga preso

Umabot na sa higit P47 milyon ang ginastos ng pamahalaan para maprotektahan ang mga bilanggo sa pagkakahawa sa COVID-19.

Batay sa ulat na isinumite ni Pangulong Rodrigo Duterte sa Kongreso, sinabi nito na P47,363,816.47 ang kabuuang halaga na nagastos ng Bureau of Jail Management and Penology (BJMP) sa pagbili ng mga gamot, personal protective equipment at operational expenses para sa digital conferencing sa jail monitoring.

"The Jail Bureau incurred a total of P47,363,816.47 for procurement of medicines, [personal protective equipment], and operational expenses for digital conferencing on jail monitoring," nakasaad sa dokumento.

Matatandaang mula noong March 20, isinailalim na sa total lockdown ang lahat ng jail facilities ng BJMP, at kinansela rin ang visitation privileges ng mga persons deprived of liberty (PDLs).

Ipinatupad din ng BJMP ang E-Dalaw kung saan maaari pa ring makausap ng mga PDLs ang kanilang mga kaanak sa pamamagitan ng tawag sa telepono at video conferencing.

Ito ay para maiwasan na rin ang mass congregation activities o pagtitipon-tipon sa loob ng mga kulungan.

Bukod dito, nagsagawa rin ng disinfection sa lahat ng mga bilangguan at ipinatupad ang “no mask, no entry” policies at iba pa.