Sen. Bong Go, Speaker Cayetano, iba pang mambabatas nag-self-quarantine na

Ilang mambabatas at miyembro ng gabinete ni Pangulong Rodrigo Duterte ang nagdesisyong mag-self-quarantine na matapos ianunsiyo kagabi ni House Appropriations Committee Chairman Eric Yap na nagpositibo siya sa COVID-19.

Kabilang si Sen. Bong Go na nakasama si Yap sa pagpupulong nila sa Malacañang noong Sabado, Marso 21.

“Wala naman po akong nararamdamang sintomas ng sakit. But since protocol requires that those who were directly exposed to persons positive for COVID-19 need to undergo self-quarantine, I am left with no choice but to comply,” ani Go.

Samantala, bagama't walang personal contact kay Yap at maayos naman daw ang kanyang kalusugan sa ngayon, sasailalim din sa self-quarantine si Minority Leader Bienvenido Abante, Jr.

Nakasama ni Abante si Yap sa special session ng Kamara nitong Lunes, Marso 23, nang talakayin nila ang special powers na iginawad kay Pangulong Duterte sa gitna ng COVID-19 pandemic.

Ganito rin ang gagawin nina Budget Secretary Wendel Avisado at Social Welfare Secretary Rolando Bautista, batay sa inilabas nilang mga pahayag.

Samantala, 21 kongresista at sampung staff din ang sasailalim sa 14 na araw na self-quarantine. Ayon kay House Secretary General Jose Luis Montales, susunod sa protocol ang mga mambabatas kabilang si Speaker Alan Peter Cayetano.

Bukod kay Yap at Speaker Cayetano kabilang sa mga dumalo sa sesyon sina Majority Leader Martin Romualdez, Minority Leader Benny Abante, Deputy Speakers Raneo Abu, LRay Villafuerte, Roberto

Puno at Aurelio Gonzales, Rep. Wilter Wee Palma, Rep. Precious Hipolito, Rep. Mikey Arroyo, Rep. France Castro, Rep. Janette Garin, Rep. Romeo Jalosjos Jr., Rep. Jesus "Bong" Suntay, Rep. Manny Lopez, Rep. Tonypet Albano, Rep. Jonathan Sy-Alvarado, Rep. Abraham Tolentino, Rep. Francis Abaya at Rep. Mike Defensor.

Sina Majority Leader Romualdez, Minority Leader Abante at Rep. Garin ay nagpahayag na kusang sasailalim sa self-quarantine kahit pa sila ay walang nararamdamang sintomas.

Nakatakda ring muling magsagawa ng disinfection sa Kamara.

Matatandaang, dalawa rin sa mga staff sa House of Representatives ang nagpositibo at namatay dahil sa COVID-19.