Parehong petsa sa 2021 ng Summer Olympics sa Tokyo, hiniling

Umaasa ang koponan ng USA basketball na ang nakatakdang pagsasagawa ng Tokyo Olympics sa susunod na taon ay papalo sa parehong buwan na gaganapin dapat sa Hulyo.

Inihayag ni USA basketball managing director Jerry Colangelo na ang kumplikadong sitwasyon na dinaranas ng mga coaches at manlalaro ay mas magiging mahirap para sa kanila kung makakaepekto ito sa schedule ng National Basketball Association (NBA).

Ang tanging magagawa na lamang ng kanilang koponan ay maghintay sa magiging plano para sa susunod na Olympics na sinasabing maaring gawin bago ang Summer sa susunod na taon.

“It's pretty simple, isn't it? We either have NBA players or we don't,” pahayag ni Colangelo sa panayam sa kanya ng The Associated Press. “And if we don't, we'll look at the other options.”

Hanggang sa kasalukuyan ay nananatili ang puwesto nito sa US basketball hanggang 2021, tulad rin ng mga coaching staff nito na sina head coach Gregg Popovich ng San Antonio Spurs, assistant coaches Steve Kerr ng Golden State Warriors, Lloyd Pierce ng Atlanta Hawks at Jay Wright ng kolehiyo mula Villanova.

Nakatakda sana ang Summer Olympics simula Hulyo 24-Agosto 9 sa Tokyo, Japan, na siyang off-season ng NBA, ngunit dahil sa opisyal na anunsyo ng International Olympic Committee (IOC) na ipagpaliban ang quadrennial meet dahil sa lumalalang krisis sa coronavirus (covid-19) pandemic, maaantala ang nasabing palaro ng hindi hihigit sa isang taon.

Kung kaya’t maaaring lumapag ang bagong schedule ng Olympics sa Abril, Mayo o Hunyo, na maaaring magkaroon ng pagbabago sa mga plano sa Estados Unidos, partikular na sa NBA season.

“We're hopeful that this is going to take place in the same time-frame next summer as it was scheduled for this summer,” saad ni Colangelo. “There are a lot of things that have to be done totally out of our control. We're a follower in this situation. We're dealing with the NBA, FIBA, the USOC, the International Olympic Committee, etc., etc. Here's what we have to wait for now: What are the dates? Once they set the dates, then we will go into action.”

Nasa proseso pa lamang ng pagpili ng 12-man roster ang US basketball team na binubuo ng 44 na manlalaro mula sa iba’t ibang koponan sa NBA at amateur ranks. Ilan sa mga kilalang mga NBA superstars ay sina LeBron James ng LA Lakers, Stephen Curry ng Warriors, James Harden ng Houston Rockets, Kevin Durant ng Brooklyn Nets, at Anthony Davis ng Lakers.