Banta ng station chief, nag-viral... "Lalabas ng bahay, pagbabarilin!"

Nasa 'hot water' ngayon ang isang station commander ng Manila Police District (MPD) matapos mag-viral sa social media ang ginawa niyang pagbabanta sa mga residente na kanyang pagbabarilin kapag lumabas sa kanilang mga bahay nang wala sa oras sa Quiapo, Manila.

Kaugnay nito, iniutos ni MPD Director P/Gen. Rolando Miranda na imbestigahan si PLt. Col. Reynaldo Magdaluyo, station commander ng MPD-Police Station 3.

Ayon naman kay Magdaluyo, hindi siya nagsisisi sa kanyang ginawa at inamin niya na siya nga ang nasa video.

Aniya, ginawa lamang niya ang kanyang tungkulin dahil marami talaga sa mga residente ang pasaway at kahit na nagpapatupad ng lockdown ay patuloy pa ring nasa kalsada.

Bukod dito, sinabi ni Magdaluyo na may ilang patients under investigation (PUIs) at person under monitoring (PUMs) ang nasa lugar.