Boxer Bautista, nanalo sa elims ng Olympic qualifying

Photo: abs-cbn

Nagpamalas ng pambihirang diskarte at kumbinasyon si 2019 Southeast Asian Games bronze medal winner Ian Clark Bautista upang maitakas ang isang split decision victory laban sa dating world champion sa men’s bantamweight category ng Asian-Oceania Continental Olympic Qualifying Tournament sa Prince Hamza Hall sa Amman, Jordan.

Pinaboran ng mga hurado ang 26-anyos na Filipino boxer laban kay Asian at World Youth Championships gold medalists Hayato Tsutsumi (18-3, 2KOs) ng Japan sa round-of-32 ng elimination round ng men’s 57kgs division. Sunod na makakatapat ng Felix Stamm Memorial champion na si Bautista sa round of 16 si 30th edisyon SEA Games gold medal winner at third-seeded Chatchai-Decha Butdee ng Thailand sa Sabado ng gabi. Ang Thai-boxer na si Butdee ang tumalo kay Bautista sa biennial meet sa semis ng parehong kategorya sa pamamagitan ng 3-2 split decision.

Bahagyang nakalalamang sa tangkad ang 20-anyos na Chiba City-native na si Tsutsumi ngunit mas malakas ang mga binibitawang suntok ng Pinoy pug lalo na sa pagkakaraoon nito ng arsenal na double-hook.

Ninais ng dating world champion na gamitin ang range nito sa ikalawang round na tiyak na malaking armas laban sa mas maliit na si Bautista.

Nagpakawala ng uppercut si Bautista na ginantihan naman ng mga body shots ng Japanese boxers ngunit hindi naging sapat para makuha ni Bautista ang 4-1 iskor sa round two.

Umariba ng mga suntok ang dalawang boksingero sa huling round kung saan bumato ng mabibigat na kamao si Bautista at iba’t ibang kumbinasyon upang makitang malinaw ng mga hurado para maibigay ang split decision victory kay Bautista.

Kasalukuyan namang lumalaban bilang number one seed si Women’s Featherweight World Champion Nesthy Petecio laban kay Krismi Ayoma Dulanj Lankapurayalage ng Sri Lanka sa women’s 57kgs division.

Sasampa rin sa ibabaw ng ring si SEAG silver medalist Riza Pasuit laban kay Saya Hamamoto ng Japan sa women’s under-60kgs lightweight category round-of-16.