Sementeryo para sa mga Muslim, pirmado na

Nilagdaan kahapon ni Manila Mayor Francisco ‘Isko Moreno’ Domagoso ang Manila Ordinance No. 8608 na nag-eestablisa sa pagtatayo ng Manila Muslim Cemetery.

Ayon kay Moreno, naglaan din ang Manila City Council ng P49.3 milyon para sa pag-develop ng sementeryo na itatayo sa Manila South Cemetery.

Kasama rin sa proyekto ang konstruksiyon ng Cultural Hall, gayundin ang paglikha ng plantilla items para sa pag-hire ng mga personnel sa ilalim ng bagong Muslim Cemetery Division.

Sasakupin ng Manila Muslim Cemetery ang may 2,400 square meters na lupa na magsisilbing exclusive ground para sa paglilibing at paglilipat sa mga labi ng mga yumaong residenteng Muslim.

Ang operasyon ng Manila Muslim Cemetery ay nasa ilalim ng kontrol at pamamahala ng Manila Health Department (MHD).

Ayon kay Moreno, ang ordinansa ay nilagdaan bilang pagkilala sa cultural attributes at customary traditions ng Muslim community sa Maynila.

Sinaksihan nina Vice-Mayor Honey Lacuna-Pangan, Majority Floor Leader Joel Chua, Second District Councilor Darwin “Awi” Sia at miyembro ng Manila City Council ang paglagda ni Moreno sa ordinansa.