Orcullo, isa sa mainit ang pag-atake sa Diamond Open

Pangungunahan ni Dennis “Robocop” Orcullo, isa sa pinakamainit na cue artist sa buong mundo ngayong taong ito, ang atake ng mga Pinoy sa 2020 Diamond Las Vegas Open sa Rio Hotel Casino sa Las Vegas, Nevada simula Marso 11 hanggang 14.

Dalawang buwan pa lang ang nawawala ngayong kasalukuyang taon pero apat na korona at tatlong iba pang podium performances na ang nairehistro ng 41-taong-gulang na manunumbok mula sa Bislig, Surigao.

Sa malupit na Derby City Classic (DCC), naghari siya sa 9-Ball Banks at sa karera para sa Master of the Table habang walang nakatapat sa tikas niya sa Music City Challenge (MCC) Midnight Madness at sa Texas 10-Ball Open.

Nahablot din niya ang runner-up honors sa MCC 9-Ball Open Division maliban pa sa pagkuha ng pangatlong puwesto sa DCC 9-Ball Division at sa Andy Mercer Memorial.

Bukod kay Orcullo, may-ari ng 10-Ball gold medal sa nakaraang SEA Games at ngayon ay tumatrangko sa AZBilliards moneyboard, hahataw din ang iba pang kinatawan ng lahing-kayumanggi tulad nina dating World Games at World 9-Ball king Carlo “Black Tiger” Biado, Billiards Congress of America (BCA) Hall of Famer Francisco “Django” Bustamante, ang simbolo ng bagong henerasyon ng Philippine billiards Zorren James “Dodong Diamond” Aranas, isa pang BCA Hall of Famer Alexander “The Lion” Pagulayan, dating world 9-ball championships 2nd placer Roland Garcia at Jeffrey De Luna.

Nariyan din ang mga pambato ng punong-abala Corey Deuel, Earl “The Pearl Strickland, Billy Thorpe, Skyler Woodward at WPA no. 3 Shane Van Boening.