Iba’t ibang brands ng pekeng lipstick, inilabas ng FDA
Mga suki, partikular sa kababaihan, mahilig ba kayong magpaganda o gumamit ng make-up lalo na ng lipstick? P'wes, para sa inyo ang tatalakayin natin.
Kamakailan, naglabas ng babala ang Food and Drug Administration (FDA) tungkol sa paggamit ng lipstick na hindi rehistrado ng nasabing ahensiya.
Nabuking ng FDA na may ilang brand ng lipstick na kumakalat ngayon sa merkado ang hindi dumaan sa tamang proseso o quality checking ng produkto. Ito ay ibinebenta ng ilang vendors sa Kalakhang Maynila na ang hangarin lamang ay kumita nang limpak-limpak, kesehodang, magdulot ang mga ito ng panganib sa kalusugan ng kanilang mga mamimili.
Narito ang mga brand ng lipstick na hindi rehistrado ng FDA:
Monaliza Series Lipstick
Yes Now Make-Up Moist Lipstick
Matte Clareal Bold Matte Lipstick 2
3 Colors Kiss Tint Clareal
Samantala, sa isinagawang post marketing surveillance ng ahensiya sa mga nabanggit na cosmetic products, napag-alaman ng awtoridad na walang certificate of product notification ang mga pekeng produkto kaya mahigpit itong ipinagbabawal sa merkado.
Kaugnay nito, pinag-iingat ang mga mamimili na huwag itong tangkilikin dahil ang mga nabanggit na pekeng produkto ay posibleng magdulot ng masamang epekto sa kalusugan ng sinumang gagamit nito.
Oh, mga ka-BULGAR, alam n’yo na, ha? Huwag kayong basta na lang bili nang bili ng ganitong produkto kahit sabihing mura lamang ang mga ito kumpara sa mga nabibili sa mall dahil baka imbes na gumanda kayo, eh, sa ospital o sa “tahimik na lugar” (sementeryo) ang bagsak ninyo.
Ikaw kaibigan, anong sey mo?
Palaging tatandaan, walang maloloko kung walang magpapaloko! Ligtas ang may alam.
Kaya ikaw, ako, tayo… mag-ingat!
Comments