Criminology student, patay sa hazing

Nasawi ang 23-anyos na estudyante ng Criminology habang naospital ang isa pa makaraan umanong isalang sa fraternity hazing rites sa bayan ng Bulan, Sorsogon.

Tinukoy ni Major Joel Triñanes, Bulan police chief, ang pagkakakilanlan ng namatay na mag-aaral na si Omer Despabiladeras, ng Solis Institute of Technology.

Kasama umano ni Despabiladeras ang 17 iba pa na sumalang sa hazing ng Tau Gamma Fraternity sa Bgy. Vicente, alas-10:00 ng umaga ng Linggo.

Sinasabing bumagsak si Despabiladeras sa gitna ng hazing at agad na isinugod sa Pantaleon Gotladera Memorial Hospital ngunit, hindi na rin umabot ng buhay.

Patuloy namang ginagamot sa Sorsogon Provincial Hospital ang estudyante ring si Alfredo Gonia. Sinisiyasat ng mga awtoridad ang posibleng mga dapat managot sa insidente.