Fil-Japanese Saso, perpekto ang laro sa Women’s Australian Open

Inirehistro ni Fil-Japanese Yuka Saso ang kan­yang pangatlong sunod na sub-par performance upang makaahon mula sa pang-107 na baytang at ma­isalba ang iskor na 4-under-par 288 at ang isang upuan sa unang 25 finishers sa pres­tihiyosong 2020 ISPS Handa Women’s Australian Open sa palaruan ng Seaton, South Australia.

Kabaligtaran ang naging kampanya ng pambato ng Canlubang na si Dottie Ar­dina na matapos makapasok sa top 10 noong round 2 ay naupos at dumulas na lang sa pang-48 na baytang dahil sa rekord na 291 strokes.

Isang mapaklang 2-over-par 75 ang isinuko ni Saso sa pambungad na round ng kumpetisyong umakit sa mga pangunahing professio­nal lady golfers mula sa iba’t-ibang parte ng daigdig kaya maaga siyang nangu­lelat. Sa Round 2, nang pla­no nang kalusin at pauwiin ng organizer ang mga ma­lamyang kalahok, apat na birdie at dalawang bogeys para sa iskor na 2-under-par 71 ang nagtawid sa kanya sa cut-off papunta sa week­end play.

Nasaksihan noong Round 3 ang pormang nagbigay sa kanya ng dalawang Asian Games gold medal at isang pilak sa Youth Olympic Games dahil sa naitala ni­yang 3-under-par 70 bago siya kumartada ng 1-under-par 71 sa huling round.

Samantala, sa kabila ng resulta, ang dating pamo­song jungolfer ng Pilipinas na si Ardina ay kasaluku­yang bumabandera sa Club­car Series ng Australian La­dies Professional Golf (AL­PG) dahil sa nakulektang 973.33 puntos. Malaking tulong dito ay nang nakuha niya ang korona ng 2020 Bal­larat Icons Pro-Am Tour­nament na nagkakahalaga ng $4,500 at may kaakibat na 500 puntos. Nangaldag din si Ardina sa Aoyuan In­ternational Moss Vale Pro-Am matapos siyang sume­gun­da rito at magbulsa ng gantimpalang $3,000. May naipon rin siyang 400 series points mula sa nabanggit na kaganapan. Pampito ang Pi­nay golfer sa Findex Yam­ba Pro-Am.